Раиси Бонки миллии Тоҷикистон Ҳоким Холиқзода бо раиси Бонки миллии Швейтсария Томас Ҷордан мулоқоти фосилавӣ доир намуд, ки дар он масоили ҳамкории низоми бонкии кишварҳо мавриди баррасӣ қарор гирифтанд.

 

Ҳоким Холиқзода ба сатҳу сифати ҳамкории бонкҳо баҳои баланд дода, ҷаноби Томас Ҷордан ва ҳамроҳони ӯро бо вазъи макроиқтисодӣ ва низоми бонкии кишвар шинос кард.

Зикр гардид, ки новобаста ба таъсири амиқ ва номуайяниҳое, ки бар асари пандемияи COVID-19 ба вуҷуд омаданд, Ҷумҳурии Тоҷикистон тавонист бо тадбирҳои андешидаи Ҳукумат рушди муътадили иқтисоди кишварро таъмин созад.

Давоми моҳҳои январ - августи соли 2021 ММД-и кишвар 56,3 миллиард сомонӣ ва афзоиши воқеии он 8,7 фоизро ташкил дод, ки рушди он нисбат ба ҳамин давраи соли гузашта 5 банди фоизӣ зиёд мебошад.

- Дар шароити кунунӣ пешгӯйӣ кардани санаи дақиқи бартараф намудани пайомадҳои вазъи мураккаби ҷорӣ, ки дар натиҷаи паҳншавии пандемияи COVID-19 ба миён омадаанд, ғайриимкон мебошад. Аз ин лиҳоз, Бонки миллии Тоҷикистон минбаъд низ ҷиҳати коҳиш додани таъсири пандемия ба бахшҳои иқтисодӣ ва иҷтимоии кишвар татбиқи чораҳои заруриро идома медиҳад,- иброз дошт Ҳоким Холиқзода.

Раиси Бонки миллии Швейтсария Томас Ҷордан огоҳии хешро аз чораҳои сари вақт андешидаи Ҳукумати Ҷумҳурии Тоҷикистон ҷиҳати коҳиши таъсири манфии пандемияи COVID-19 ба иқтисодиёти кишвар иброз дошта, зикр кард, ки тадбирҳои андешида имкон доданд, то соли молиявӣ бо нишондиҳандаҳои мусбат ҷамъбаст шавад.

Бонки миллии Тоҷикистон бо як қатор сохторҳои давлатӣ ва ташкилотҳои Швейтсария ҳамкории босамарро ба роҳ мондааст ва ин боиси қаноатмандии ҳар ду ҷониб мебошад. Аз ҷумла, Бонки миллии Тоҷикистон дар самти таъмини устувории суботи молиявӣ, идораи самараноки захираҳои байналмилалӣ ва татбиқи сиёсати монетарӣ бо Дафтари Швейтсария оид ба ҳамкорӣ (SECO) равобити судмандро роҳандозӣ намуда, дар ин замина ҷиҳати рушди низоми бонкии кишвар аз кумакҳои техникӣ ва машваратии ниҳоди мазкур бархӯрдор гардидааст. Томас Ҷордан барои идомаи ҳамкории мутақобилан судманд дар самтҳои зикргардида ҳавасмандӣ зоҳир намуд.

Мулоқоти мазкур дар доираи ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ, ки 11 - 17 октябри соли 2021 дар шаҳри Вашингтони Иёлоти Муттаҳидаи Амрико доир гардида, дар он вазирони молия, роҳбарони бонкҳои марказӣ ва сиёсатмадорони сатҳи ҷаҳонӣ иштирок намуданд, баргузор шуд.

 

Муҳаммадзоиршо ШАРИФЗОДА, “Ҷумҳурият”