ТАСС. Интихоботи президентӣ дар Ӯзбекистон рӯзи якшанбе дар фазои ором ва бо ҳузури анъанавии баланди интихобкунандагон баргузор шуд. Нозирони байналмилалӣ омодагии босифат ба ҷараёни раъйдиҳӣ ва таваҷҷуҳи шаҳрвандони кишварро дар татбиқи ҳуқуқҳои интихоботӣ қайд карданд. 

Ҳавои гарму офтобӣ, ки то охири ҳафта пас аз сардии аввалҳои ҳафта ба кишвар баргашт, низ ба табъи болида ва фаъол шудани шаҳрвандон мусоидат кард. То замоне, ки участкаҳои интихоботӣ соати 20:00 ба вақти маҳаллӣ баста шуданд, иштироки мардум аз 80 дарсад гузашт, аммо ин рақам ниҳоӣ нест, зеро овоздиҳӣ дар як қатор кишварҳои хориҷӣ, ба мисли ИМА, ҳоло ҳам идома дорад.

 

Фавти кӯдакон дар Афғонистон аз гуруснагӣ  

 

Лента. ру. Собиқ вакили порлумони Афғонистон Муҳаммад Муҳаққиқ гуфт, ки дар қисми ғарбии Кобул 8 кӯдак аз гуруснагӣ ҳалок шудаанд. Ӯ зикр кард, ки дар ин минтақа ҷамоати ҳазораҳо зиндагӣ мекунанд. Суханони ӯро АИР «Новости» иқтибос овардааст.

Муҳаққиқ афзуд, ҳаракати «Толибон», ки ба қудрат расид, сатҳи зиндагии мардумро муҳайё намекунад ва аз ҷомеаи ҷаҳонӣ хостааст, ба ҳазораҳо ва шиаҳои Афғонистон кумак кунанд. 

Моҳи сентябр роҳбари  миссияи Созмони Милали Муттаҳид оид ба  ёрии Афғонистон Дебора Лайонс ҳушдор дода буд, ки бидуни кумаки молии ҷомеаи ҷаҳонӣ ба Афғонистон қаҳтии густарда дар ин кишвар оғоз мешавад. Вай таъкид кард, ки кишварҳои хориҷӣ аз дастрасии Афғонистон ба миллиардҳо доллар дороиҳои молӣ ва маблағҳои донорӣ ҷилавгирӣ кардаанд, то  онҳо ба дасти «Толибон» нафтанд.

 

 

Инсоният метавонад коронавирусро мағлуб кунад

 

RT. Роҳбари Созмони  ҷаҳонии тандурустӣ Тедрос Гебрейесус гуфт, ки инсоният барои мағлуб кардани пандемияи коронавирус тамоми имкониятҳоро дорад.  Дар ин бора AFP хабар  медиҳад. "Пандемия вақте хотима меёбад, ки оламиён онро хоҳанд. Ин дар дасти мост”, - гуфт ӯ.

Бо вуҷуди ин, ӯ қайд кард, ки одамон натавонистанд ин имкониятҳоро хуб истифода баранд. Гебрейесус илова намуд, ки ҳадафи СҶТ эм кардани ҳадди аққал 40 дарсади аҳолии ҳар як кишвар то охири соли 2021 мебошад.

Қаблан, Дабири кулли СММ Антониу Гутерриш гуфта буд, ки барои маъракаи тақсимоти одилонаи ваксинаҳо бар зидди коронавирус фавран 8 миллиард доллар лозим аст.

 

 

Токаев бо сафари давлатӣ ба Туркманистон омад

 

КазТАГ. “Президенти Қазоқистон Қосим-Жомарт Токаев бо даъвати  Президенти Ҷумҳурии Туркманистон Гурбонгулӣ Бердимуҳамедов бо   сафари давлатӣ ба шаҳри Ашқобод омад”, - изҳор намуд котиби матбуоти Сарвари давлат Берик Уали.

Ба гуфтаи ӯ, барномаи сафар музокироти ҳайатҳои ду кишварро дар  доираи хурд ва васеъ дар бар мегирад. “Тарафҳо вазъ ва дурнамои рушди шарикии стратегии Қазоқистону Туркманистон, инчунин, масъалаҳои рӯзномаи минтақавӣ ва байналмилалиро баррасӣ хоҳанд кард”, - гуфт Уали.