Туҳфаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон - китоби «Тоҷикон» ба ноҳияи Исмоили Сомонӣ расид. Теъдоди китоби мазкур 25 ҳазору 96-торо ташкил медиҳад.

Аз ҳисоби раисони маҳаллаҳо ва кормандони Мақомоти иҷроияи маҳаллии ҳокимияти давлатии ноҳия гурӯҳи корӣ ташкил гардида, ин  туҳфаро ба ҳар оила мерасонанд.

Мақсади асосии  чунин иқдом шиносоӣ бо гузаштаи пурифтихори халқи тоҷик ва дар ин замина баланд бардоштани ҳисси худшиносии насли имрӯзу фардои миллат мебошад.

 

 

Ширкати ҳайати Тоҷикистон дар ҳамоиши кумитаҳои олимпии ҷаҳон

Ассамблеяи генералии XXV Ассотсиатсияи кумитаҳои миллии олимпӣ (ANOC) дар ҷазираи Крити Юнон бо иштироки намояндагони кумитаҳои миллии олимпии ҷаҳон, КБО, федератсияҳои байналмилалӣ ва дигар ҷонибҳои манфиатдори ҳаракати олимпӣ доир шуд. Дар ин бора Кумитаи миллии олимпии Тоҷикистон хабар дод. 

Дар ҳамоиш намояндагони 148 Кумитаи миллии олимпӣ ширкат намуда, 57 кумитаи дигар фосилавӣ пайваст шуд. Тоҷикистонро ноиби президенти Кумитаи миллии олимпӣ Аҳтам Абдуллозода ва котиби генералӣ Муҳаммадшо Абдуллозода намояндагӣ карданд.

Гурӯҳи корӣ дар бораи раванди дархост барои мизбонии Бозиҳои соҳилии ҷаҳонӣ маълумот дод ва тасдиқ кард, ки ҳайат аз ҷониби Шурои иҷроияи ANOC барои пешрафти дархости Индонезия барои мизбонии нашри бозиҳо дар соли 2023 ваколатдор шудааст.

 

 

Аз 1 то 10 ноябр таътили тирамоҳии хонандагон

1 ноябр дар тамоми муассисаҳои таҳсилоти умумии Ҷумҳурии Тоҷикистон таътили тирамоҳӣ оғоз шуда, то 10 ноябр идома меёбад. Чоряки якум 31 октябр дар тамоми муассисаҳои таҳсилоти миёнаи умумӣ ҷамъбаст гардида, хонандагон ба муддати даҳ рӯз ба таътили тирамоҳӣ мебароянд, - иттилоъ доданд аз Вазорати маориф ва илм.

Таътили тирамоҳӣ танҳо ба хонандагон дахл дошта, омӯзгорон дар ин муддат ба корҳои методӣ ва гузарондани маҷлисҳои падару модарон ва чорабиниҳои таълимӣ сафарбар мешаванд. Инчунин, барои хонандагон рӯйхати китобҳое тавсия мешавад, ки дар таътил онҳоро бояд мутолиа намоянд. Ин давра, ҳамчунин, даври якуми олимпиадаи дохилимактабӣ оғоз мегардад.

 

 

Хизматрасонӣ ба беш аз 600 ҳазор мусофир дар нуҳ моҳ

Фурудгоҳи байналмилалии Душанбе дар нуҳ моҳи соли равон ба беш аз 600 ҳазор нафар мусофир хизмат расондааст, ки ин омор нисбат ба ҳамин давраи соли гузашта 225 ҳазор  зиёд аст, - иттилоъ доданд аз фурудгоҳ.

Миқдори умумии бор ва почтаи аз ҷониби терминали боркашонӣ қабулгардида ва интиқолёфта дар  ин давра беш аз 965 тоннаро ташкил медиҳад. Ҳамзамон, тавассути терминали боркашонӣ беш аз 46 тонна маҳсулоти кишоварзӣ ба хориҷи мамлакат содирот шуд.

 

 

Кӯдакони дорои нуқсони модарзодии дил ройгон ҷарроҳӣ мешаванд

Аз 23 октябр то 2 ноябр бо ташаббуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва дастгирии  Амороти Муттаҳидаи Араб дар Маҷмааи тандурустии «Истиқлол»  кӯдакони дорои нуқсони модарзодии дил ҷарроҳии ройгон мешаванд, - иттилоъ доданд аз  Вазорати тандурустӣ ва ҳифзи иҷтимоии аҳолӣ.

Мақсад аз роҳандозии иқдоми мазкур дастгирӣ ва кумак ба оилаҳои камбизоатест, ки кӯдакони гирифтори бемориҳои нуқсони дили модарзодӣ доранд.

Кӯдакону наврасони то 18-сола, ки  нуқсони модарзодии дил доранд, метавонанд бо  маълумотномаи камбизоатӣ ба Вазорати тандурустӣ ва ҳифзи иҷтимоии аҳолӣ муроҷиат намоянд. Дар ҷараёни амалиёти ҷарроҳӣ мутахассисони тоҷик низ иштирок мекунанд.

 

 

COVID-19. Ягон ҳолати нав сабт нашудааст

Шабонарӯзи охир дар мамлакат ягон ҳолати гирифторшавии шаҳрвандон ба бемории  коронавинирус ба қайд гирифта нашудааст. 

Дар маҷмуъ, аз аввали бақайдгирӣ то имрӯз  дар кишвар 17086 нафар гирифтори сирояти коронавирус сабт шуда, 16960 нафар  шифо ёфт. Аз бемории мазкур 124 нафар фавтид.

Вазорати тандурустӣ ва ҳифзи иҷтимоии аҳолӣ аз шаҳрвандон даъват менамояд, ки қоидаҳои беҳдоштию зиддиэпидемикиро қатъиян риоя намоянд.