Дар замони ҷаҳонишавӣ, ки давлатҳо ба танҳоӣ наметавонанд фаъолияти комилу муваффақ дошта бошанд, масъалаҳои вобаста ба дурнамои муносибатиҳои байналмилалӣ ва дипломатия бештар доғ гардиданд. Ҳастии олам ва рушди муносибатҳои байни давлатӣ сулҳу суботи фарогир, ҳамзистии осоиштаи одамон ва даҳҳо масъалаҳои дигар аз ҳалли дурусти мавзуъҳои муносибатҳои байналмилалӣ ва дипломатия вобастагии зич дорад. Назарҳо дар робита ба ояндаи меъёрҳои муносибатҳои дипломатӣ ва дипломатияи классикӣ хеле гуногунанд. Зеро, ҷаҳони муосир давраи дигаргуниҳои глобалиро аз сар мегузаронад. Воқеоти имрӯзаи сиёсӣ аз гузариши низоми анъанавӣ ба тартиботи нави ҷаҳонӣ дарак медиҳад.

 

Ин матлабро Маҳмадалӣ Раҷабиён, мушовири калони бахши ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, зимни Конфронси байналмилалии илмӣ-амалӣ таҳти унвони «Масъалаҳои мубрами муносибатҳои байналмилалӣ ва дипломатия» ва «Тоҷикистон ва кишварҳои Осиёи Марказӣ: самтҳои ҳамкорӣ ва дурнамои рушд», ки бо ташаббуси Вазорати корҳои хориҷӣ 28 октябр баргузор гардид, иброз дошт.

Зикр гашт, ки коршиносон мушкилоти мубрами муносибатҳои байналмилалиро айни замон, пеш аз ҳама, ба  се омили асосӣ алоқаманд медонанд: нооромиҳои рӯзафзун дар муносибатҳои байналмилалӣ, ки ба инқилобҳои ранга дар Шарқи Наздик ва Африқои Шимолӣ рабт мегирад; низоъҳое, ки аз роҳи механизмҳои мавҷудаи байналмилалӣ наметавон ҳал кард; мубориза бо шаклҳои онлайнии терроризми байналмилалӣ ва қочоқи маводи мухаддир, ки манбаи маблағгузории созмонҳои террорис-тист. 

- Дар меҳвари сиёсати хориҷии Ҷумҳурии Тоҷикистон таҳким ва густариши муносибатҳои гуногунҷанбаи босубот ва дарозмуддат бо кишварҳои Иттиҳоди Давлатҳои Мустақил, алалхусус бо мамлакатҳои Осиёӣ Марказӣ, қарор дорад. Тоҷикистон ҷонибдори вусъат бахшидани таҷрибаи мусбат, бисёрасра ва созандаи ҳамзистии дӯстонаи мардумони Осиёи Марказӣ мебошад. Бо назардошти ин, кишвари мо пайваста кӯшиш ба харҷ медиҳад, ки заминаи ҳар чи мусоидро барои густариши муносибатҳои гуногунҷанба ва судманд дар фазои минтақа фароҳам оварад, - гуфт муовини вазири корҳои хориҷӣ Содиқ Ашӯрбойзода.

Муъмин Шарифзода, профессор, ректори Донишгоҳи давлатии ҳуқуқ, бизнес ва сиёсати Тоҷикистон, қайд кард, ки Ҷумҳурии Тоҷикистон дар шароити муосири муносибатҳои байналмилалӣ мавқеи муҳимро пайдо намуда, ҳамчун кишвари ташаббускор дар ҳалли масъалаҳои мубрами ҷаҳонӣ шинохта шудааст.

Дар идомаи конфронси байналмилалӣ Холаҳмад Самиев, декани факултети муносибатҳои байналмилалии ДМТ, Мирсаид Раҳмонов, ходими калони Институти Осиё ва Аврупои АМИТ, Лариса Додхудоева, профессор ва дигарон маъруза карданд.

Дар ҷамъомад дар баробари олимону муҳаққиқон, инчунин, сафирони кишварҳои хориҷӣ ва намояндаҳои корпусҳои дипломатии муқими Тоҷикистон ширкат доштанд.

 

М. МИРЗОЁН, “Ҷумҳурият”