Дар нуҳ моҳи соли равон дар ҷумҳурӣ бар асари офатҳои табиӣ ба иншооти иқтисодӣ ва соҳаи кишоварзию чорводорӣ хисороти калони моддӣ расид. Аз ҷумла, манзилҳои истиқоматӣ, бинои муассисаҳои таълимӣ ва  муассисаҳои томактабӣ, дармонгоҳҳо, иншооти маданиву маишӣ, сутунпояҳои чароғакҳо, иншооти ёрирасон, роҳҳои нақлиётӣ, пулҳо, хатҳои интиқоли барқ, қитъаҳои наздиҳавлигӣ ва хоҷагиҳои деҳқонӣ  зарар дид. Дар ин давра дар кишвар 346 ҳодиса ва ҳолати фавқулодаи дорои хусусияти табиидошта қайд гардида, ба иқтисодиёти шаҳру ноҳияҳо беш аз 141 миллион сомонӣ зарар расондааст.

 

Аз ҷониби кормандони Кумитаи ҳолатҳои фавқулода ва мудофиаи гражданӣ корҳои сохтмонии манзилҳои истиқоматӣ дар ҷамоатҳои деҳоти Лангари Шоҳ ва Қалъаи Лаби Оби ноҳияи Тоҷикобод, ки дар натиҷаи заминларза валангор шуда буданд, идома дорад.  Инчунин, дар ҷамоатҳои деҳоти Хиҷборак ва Аскалони ноҳияи Рашт, ки дар натиҷаи заминларза хонаҳои истиқоматии шаҳрвандон зарар дида буданд, бархе аз манзилҳо аз нав сохта шуда, корҳои сохтмонии қисми дигар дар ҳоли анҷомёбист. 

Тибқи фармоиши Комиссияи давлатии Ҳукумати ҷумҳурӣ оид ба ҳолатҳои фавқулода ба оилаи 9 шаҳрванди бар асари офати табиӣ ҳалокшуда кумаки яквақтаинаи моддӣ ба маблағи 9000 сомонӣ ҷудо гардид. Ҳамчунин, аз ҳисоби Фонди хароҷоти пешбининашудаи Ҳукумати ҷумҳурӣ  ба оилаҳое, ки бар асари офатҳои табиӣ дар ноҳияҳои Ванҷ, Рӯшон ва Шуғнони ВМКБ  манзилҳои истиқоматиашон пурра ва қисман зарар диданд, ба маблағи 19450 сомонӣ кумак ҷудо гашт. 

Баҳри пешгирӣ ва бартараф намудани оқибатҳои ҳолатҳои фавқулода, ташкили муҳофизат, навбатдории шабонарӯзӣ ва бурдани корҳои ободонӣ аз тарафи ҳайати шахсии қисмҳои ҳарбии кумита як қатор корҳо иҷро гардиданд. Аз ҷумла, бо фармоиши раиси кумита сарбозони қисмҳои ҳарбӣ  ба ҳифзи биною иншоот сафарбар шуданд. Афсарону сарбозон ҷиҳати бартараф намудани рафъи оқибатҳои офати табиӣ ва тақсимоти кумаки башардӯстона ба шаҳри Кӯлоб сафарбар шуданд.  

Дар натиҷаи ҳамкориҳои байналмилалӣ бо дастгирии дафтари Созмони Амният ва Ҳамкорӣ дар Аврупо дар Душанбе 50  дастгоҳи алоқа ба маблағи беш аз 210 ҳазор сомонӣ ҳамчун кумаки бебозгашт ба кумита ворид гардид. 

Дар доираи татбиқи минбаъдаи ҳамкориҳои байналмилалӣ, дар самти пешгирӣ ва рафъи оқибатҳои офатҳои табиӣ ва беҳбудии кори маркази таълимӣ - методӣ дар раёсатҳои вилоятии кумита, аз ҷониби дафтари САҲА дар Душанбе 12 ноутбук ва 12 компютери фардӣ ба маблағи 253 ҳазору 491 сомонӣ ворид шуд.

Инчунин, бо маблағгузории Бонки ҷаҳонӣ сохтмони бинои нави Маркази идоракунии ҳолатҳои буҳронии кумита дар ҳаҷми 2,1 миллион доллар ва таъмини он бо таҷҳизоти зарурӣ ва мустаҳкам намудани иқтидори техникии шуъбаи иттилоотию таҳлилии он бо харҷи 1,9 млн доллар ба нақша гирифта шудааст. 

Бо ин мақсад, қарордоди тарафайн байни ширкати ҶДММ “НУЗАМ” ва Муассисаи давлатии “Маркази татбиқи лоиҳаи дастрасӣ ба маблағгузории сабз ва маблағҳои рушди деҳот”-и Вазорати молия ба имзо расонда шуд. Айни замон корҳои сохтмонӣ идома доранд.

Дар қисми ҳарбии 45045 сохтмони марҳилаи якуми Маркази миллии тамринӣ барои омода намудани наҷотдиҳандагон дар асоси татбиқи лоиҳаи “Устувории сарҳади ҷанубии Тоҷикистон бо Афғонистон” тавассути дафтари САҲА дар Душанбе, бо маблағгузории Иттиҳоди Аврупо дар ҳаҷми зиёда аз 1 миллион евро амалӣ мешавад. Корҳои сохтмонии марҳилаи якум аз моҳи январи соли ҷорӣ оғоз гардида, моҳи ноябри соли равон ба анҷом хоҳанд расид. Дар марҳилаи якум сохтмони меҳмонхона барои 121 нафар, ошхона барои 80 кас, гузаргоҳ, сохтмони канализатсия, корҳои обтаъминкунӣ, барқтаъминкунӣ ва системаи гармидиҳӣ анҷом дода мешаванд.

Бо мақсади баланд намудани маҳорати касбӣ, бозомӯзӣ, такмили малакаи кормандон ва омӯхтани таҷрибаи кишварҳои хориҷӣ дар самти пешгирӣ ва рафъи ҳолатҳои фавқулода дар ҷумҳурӣ 19 маротиба курси омӯзишӣ ва семинару тренинг баргузор гардид. 

 

Нигина РАҲМОН,

«Ҷумҳурият»