Бунёдкориву созандагӣ аз хислатҳои наҷиби инсонист. Ва хушоянд аст, ки   солҳои охир дар шаҳру навоҳии кишвар мардони баоруномус ба корҳои ободонию созандагӣ даст мезананд. Соҳибкорони банангу номуси Ватан дар пайравӣ ба Пешвои миллат баҳри ободии диёри хеш саҳми арзанда гузошта, ба хотири беҳ гардондани шароити зиндагӣ дар деҳот саъй менамоянд. Ҳамарӯза шоҳиди он мегардем, ки бунёди корхонаҳои зебову  замонавӣ дар деҳаҳои дурдасти кишвар мавриди истифода қарор мегиранду мардумро ба ояндаи дурахшон дилгарм менамоянд. 

Бо ташаббуси мардони саховатманд ҳоло дар деҳаҳои дурдаст низ, биноҳои баландошёна қомат афрохтаанд. Боиси зикр аст, ки ба шарофати Истиқлоли давлатӣ ва боло гирифтани ҳисси ватанхоҳиву ватанпарастӣ мардум баҳри рушди деҳот ва муҳайё намудани имкониятҳои хуби зиндагӣ дар минтақаҳои кӯҳистон камари ҳиммат бастаанд. 

Мустафо Абдуллоев  аз зумраи чунин нафарон мебошад. Ин фарди ватандӯст ҷиҳати боз ҳам беҳтар гардондани шароити қабули сайёҳҳони дохиливу хориҷӣ дар ноҳия Сангвор меҳмонхонаи замонавии 4-ошёна сохта, мавриди истифода қарор дод. Иншоот, ки  дар арафаи Ҷашни фархундаи 30-солагии Истиқлоли давлатӣ ба истифода дода шуд, барои  сокинони ноҳия туҳфаи арзандаи  ҷашнӣ арзёбӣ гардид.

 - Вақте медидам дар дигар шаҳру навоҳии кишвар аз ҷониби соҳибкорон биноҳои барои ҷомеа зарурӣ мавриди истифода қарор мегиранд ба худ мандешидам, ки кош рӯзе расад ман ҳам дар ободии диёр саҳме бигзорам.

Соли 2004, вақте дар бинои нимхароби меҳмонхонаи ноҳия фаъолият менамудам, медидам, ки шароит барои қабули меҳмонон хуб набуд. Гарчанде роҳбарии ин биноро ба уҳда надоштам, вале аз шикояти меҳмонон дар хиҷолат мешудам. Вақте имкон даст дод, қарор додам баҳри ободии зодгоҳам коре анҷом диҳам. Қабл аз ҳама, сохтани бинои меҳмонхонаи замонавӣ ва ба талаботи замон ҷавобгӯ ба сарам омад. Ҳамин тавр, дар мувофиқа бо мақомоти иҷроияи маҳаллии ҳокимияти давлатии ноҳия дар таҳкурсии собиқ бинои меҳмонхонае, ки соли 2000 – ум муваққатан барои қабули 3 - 4 нафар меҳмон бунёд шуда буд, сохтмони бинои навро оғоз кардем. Хушбахтона, бинои меҳмонхонаи замонавӣ дар маркази ноҳияи Сангвор дар муддати кӯтоҳ сохта шуд. Меҳмонхона номи «Таҳмина» - ро гирифт. Он  аз 4 ошёна иборат буда, дорои 12 ҳуҷра мебошад. Бино бо истифода аз унсурҳои хоси миллӣ оро ёфта, дар он тамоми шароити истироҳату фароғат муҳаёст. Ва ман шодам, ки дар ободии диёр саҳм гузоштам. Вале ин охири кор  нест, - иброз намуд М. Абдуллоев. 

Зикр бояд намуд, ки меҳмонхонаи «Таҳмина» дар ҳудуди ноҳия баъди солиёни дароз ягона маркази хизматрасониест, ки дар як вақт имкони қабули 25 нафар меҳмонро дорад. Иншооти муосири хизматрасонӣ, ҳамчунин, дорои маҷлисгоҳ бо 50 ҷойи нишаст мебошад. Дар рафти корҳои сохтмонӣ дар иншоот 20 нафар бо ҷойи кори муваққатӣ ва бо мавриди истифода қарор гирифтани он 10 нафар бо шуғли доимӣ таъмин гардид. 

 

Гулнисои САЪДОНШО, «Ҷумҳурият»