Пайдоиш ва инкишофи конститутсияҳои Тоҷикистон ба таъсис ва ташаккули якумин давлати миллии Тоҷикистон алоқаманд аст. Анҷумани дуюми Ҷумҳурии Мухтори Шуравии Сотсиалистии Тоҷикистон 28 апрели соли 1929 аввалин Конститутсияро қабул кард. Он мувофиқи конститутсияҳои Иттиҳоди Шуравӣ (соли 1924) ва ҶШС Ӯзбекистон (1927) таҳия шуда буд.  

Анҷумани чоруми Шуроҳои Тоҷикистон 25 феврали соли 1931 Конститутсияи аввалини Ҷумҳурии Шуравии Сотсиалистии Тоҷикистонро қабул кард, ки он ба Конститутсияи соли 1924-и Иттиҳоди Шуравӣ мувофиқат дошт.

Конститутсияи дигар 1 марти соли 1937 аз тарафи анҷумани шашуми фавқулодаи Шуроҳои ҷумҳурӣ қабул гардид, ки моҳиятан бо Конститутсияи иттифоқии соли 1936 мувофиқ буд. Ин конститутсия 41 сол амал намуда, дар ин муҳлат ба он қариб ҳазор маротиба тағйиру иловаҳо ворид гардид. 

Конститутсияи чоруми Тоҷикистон, ки соли 1978 қабул гашт, мувофиқ ба конститутсияи собиқ шуравӣ буд ва он 16 сол амал намуд.      

Ҷумҳурии Тоҷикистон баъд аз ба даст овардани Истиқлолияти давлатӣ Конститутсияи нави худро бори аввал тариқи раъйпурсии умумихалқӣ қабул намуд. Қабули Конститутсияи Ҷумҳурии Тоҷикистон, ки ба 6 ноябри соли 1994 рост омад, аз дебоча, 10 боб ва 100 модда иборат аст.  Дар он хусусиятҳои Ҷумҳурии Тоҷикистон ҳамчун давлати соҳибихтиёр, демократӣ, ҳуқуқбунёд, дунявӣ, ягона ва иҷтимоӣ муқаррар карда шудаанд. 

Ҳамин тавр, вобаста ба дигаргуниҳо ва ба миён омадани талаботи нави замон се маротиба - солҳои 1999, 2003 ва 2016 ба Конститутсия тағйиру иловаҳо ворид шудаанд, ки ба рушду тараққиёти кишвар мусоидат намуданд.

 

Манучеҳр МУРОДАЛИЗОДА, 

сардори шуъбаи назорати давлатӣ оид ба 

регламентҳои техникӣ ва ҳуҷҷатҳои 

меъёрии техникӣ дар саноати 

вазнини  Агентии "Тоҷикстандарт"