Салимҷон Нуралиев, сардори шуъбаи Агентии меҳнат ва шуғли аҳолӣ дар ноҳия, зимни суҳбат бо хабарнигори «Ҷумҳурият» иброз дошт, ки, ҷиҳати татбиқи Барномаи давлатии мусоидат ба шуғли аҳолӣ барои солҳои 2020 – 2022, давоми даҳ моҳи соли равон ба шуъбаи Агентӣ барои пайдо намудани ҷойи кор 1472 сокини ноҳия муроҷиат кард. Аз онҳо, мутобиқи талаботи Қонуни Ҷумҳурии Тоҷикистон «Дар бораи мусоидат ба шуғли аҳолӣ», 1317 нафараш ба қайд гирифта шуд. Дар ин муддат 1058 корҷӯ (433 зан) дар асоси роҳхат дар ташкилоту муассисаҳо ва корхонаҳо соҳиби кор гашт, ки беш аз 100 дарсади нақшаи солонаро ташкил медиҳад. То охири соли равон иловатан боз беш аз 300 кас бо кор таъмин мешавад.

-Талаботи бозори меҳнат ва номгӯйи корҳои ҷамъиятиро омӯхта, дар асоси шартномаи тарафайн 80 корҷӯйи беихтисос ба корҳои ҷамъиятии музднок ҷалб мегардад,- афзуд Салимҷон Нуралиев. 

Бино ба гуфтаи ӯ, ба 29 нафар барои пешбурди соҳибкорӣ ба маблағи 110 ҳазору 800 сомонӣ қарзи имтиёзнок дода шуд ва онҳо айни замон дар соҳаҳои хизматрасонӣ, соҳибкорӣ, истеҳсолӣ ва ғайра фаъолият доранд. 

Ҳамзамон, тайи  даҳ моҳи соли равон аз шаҳрак ва деҳоти Оқсу, Лолазор, Корез, Сангтӯда, Исмат Шарифов 335 кас ихтисосҳои қаннодӣ, дӯзандагӣ, компютер, гулдӯзӣ, попуридӯзӣ, чакандӯзӣ, қуроқдӯзӣ, адрасбофӣ, кафшергари барқ, ороишгари мӯй ва муҳосибиро меомӯзанд. Инчунин, 253 шаҳрванд тариқи худмаблағгузорӣ соҳибкасб гардид. 

Соли равон ба 283 нафар ба маблағи 129 ҳазору 200 сомонӣ, аз ҷумла 33 нафари аз маҳбас озодшуда 16 ҳазор сомонӣ, 250 ҷавони аз сафи Артиши миллӣ рухсатшуда 113 ҳазору 200 сомонӣ, ёрипулӣ дода шуд. Дар баробар ин, 26 нафари аз кор ихтисоршуда 35 ҳазору 612 сомонӣ кумакпулӣ гирифт. 

Тибқи квота аз ҳисоби ҷавондухтарону ҷавонписарон ва модарони серфарзанд дар беморхонаи марказии ноҳия, ёрии аввалияи тиббӣ - санитарӣ, ҶСП «Ҷунтай Данғара Син Силу Текстил» ва шуъбаи маориф 110 нафар бо кор таъмин гашт. 

Соли равон дар асоси нақшаи чорабиниҳои раёсати Агентии  меҳнат ва шуғли аҳолии вилоят дар ноҳия бо иштироки намояндагони Мақомоти иҷроияи маҳаллии ҳокимияти давлатии ноҳия, ташкилоту муассисаҳо, корхонаҳо ва деҳот сездаҳ ярмаркаи ҷойҳои кори холӣ ва вазифаҳои озод гузашт. Дар натиҷа, 155 нафар (63 зан) соҳиби корҳои доимӣ, мавсимӣ ва муваққатӣ шуд, ки нисбат ба ҳамин давраи соли қаблӣ 29 кас зиёд мебошад.

Мақомоти иҷроияи маҳаллии ҳокимияти давлатии ноҳияи Данғара дар доираи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва иҷрои талаботи барномаи мусоидат ба шуғли аҳолӣ кӯшиш дорад, ки бо истифода аз тамоми имкониятҳо боз ҳам ҷойҳои нави кор таъсис дода, ба ин васила, сатҳи зиндагии сокинонро баланд бардорад.