Тоҷиддин Исматов, муовини сардори раёсати иқтисод ва молияи дастгоҳи раиси вилоят, оид ба омодагии ташкилоту муассисаҳо ва мақомоти маҳаллӣ ба гузарондани давраи тирамоҳу зимистони солҳои 2021-2022 фикру андешаҳояшро баён намуд. Гуфта шуд, ки вобаста ба омодагиҳо ба мавсими тирамоҳу зимистони дар пешистода, ба ҳолати якуми ноябри соли ҷорӣ аз ҳисоби маблағҳои буҷети маҳаллии шаҳру ноҳия ба соҳаи маориф 8 миллиону 816 ҳазор сомонӣ, яъне 93 дарсад ва ба соҳаи тандурустӣ барои харидории ангишт, ҳезум ва сӯзишвории дизелӣ 100 дарсад маблағгузорӣ гардидааст.

Гуфта шуд, ки захираи сӯзишвории дизелӣ дар шаҳру ноҳияҳои Бохтар, Левакант, Кӯшониён, Қубодиён, Ҷалолидини Балхӣ, Ҷайҳун, Абдураҳмони Ҷомӣ, Шаҳритус ва Шамсиддин Шоҳин барои соҳаи маориф ба талабот ҷавобгӯ нест. Масъулон зикр намуданд, ки захираи маводи хӯрока дар муассисаҳои томактабии вилоят, аз қабили орду равған, шакару биринҷ, картошака, пиёз ва сабзӣ зиёда аз 70 дарсад таъмин гардида, ин раванд дар ҳоли иҷроиш қарор дорад. 

Муовини раиси вилоят зимни гузарондани ситод масъулони шаҳру ноҳияҳое, ки омодагиҳояшон барои зимистонгузаронӣ дар ҳоли зарурӣ қарор надоранд, мавриди пурсиш қарор дода, баҳри ислоҳи камбудиҳо дастуру супориш дод. Ҳамзамон, гуфта шуд, ки зимистони имсола нисбат ба соли гузашта сард пешбинӣ гардида, бояд масъулон таваҷҷуҳи ҷиддӣ равона созанд.