14 ноябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Маҷлиси миллии Маҷлиси Олӣ, раиси шаҳри Душанбе Рустами Эмомалӣ, Сарвазири мамлакат Қоҳир Расулзода ва Раиси Маҷлиси намояндагони Маҷлиси Олӣ Маҳмадтоир Зокирзода бо рафти сохтмон дар Майдони “Истиқлол” шинос шуда, дар як гӯшаи боғ дарахтони нодири секвойя шинонданд.

Мавриди зикри хос аст, ки Пешвои муаззами миллат муҳтарам Эмомалӣ Раҳмон дарахтони секвойяи калифорниягиро 20 сол қабл аз хориҷи кишвар оварда, дар боғи Қасри миллат парвариш карданд. Дарахти секвойяи калифорниягӣ зебову нодир буда, 3000 сол умр мебинад. Секвойя дар шароити иқлими Тоҷикистон мумкин аст, то 1000 сол умр бинад.

Президенти мамлакат муҳтарам Эмомалӣ Раҳмон бо шинондани дарахт ба маъракаи ниҳолшинонӣ ва беҳдошти муҳити зист дар кишвар оғоз бахшиданд. Аз ҳозир ё дар ин мавсим шинондани дарахт хусусияти хоси худро дошта, барои 99 фоиз хуб нашъунамо ёфтани ниҳол мусоидат менамояд.

Бояд гуфт, ки то имрӯз бо дастури Пешвои муаззами миллат муҳтарам Эмомалӣ Раҳмон барои бунёди боғ дар Майдони “Истиқлол” дарахтони зиёди ороишӣ аз хориҷи кишвар ворид гардидааст. Дар маҷмуъ, то имрӯз дар гӯшаҳои алоҳидаи боғи майдони “Истиқлол” 5510  дарахти зебову нодири ороишӣ шинонда шудааст ва нашъунамои хуб дорад.

Тарҳи лоиҳаи сохтмони ин мавзеи дилкаш бо санъати нотакрор ва бо риояи меъёрҳои бунёди марказҳои фарҳангию фароғатӣ бо завқи баланди зебоипарастӣ ва табиатдӯстии Сарвари давлат муҳтарам Эмомалӣ Раҳмон таҳия гардидааст.

Оянда низ дар ҳудуди боғи Майдони “Истиқлол” дарахтони нодири сояафкану ороишии ба минтақа мутобиқ шинонда мешаванд.

Баъди ба истифода додани иншооти мазкур, ин мавзеъ минбаъд майдони асосию марказии пойтахт мегардад, зеро дар ин ҷо рамзи истиқлолу озодӣ гузошта шудааст. Масоҳати он 30 гектар буда, 2,7 гектарашро макони баргузории чорабиниҳои сиёсӣ ташкил медиҳад.

Баъди шинондани дарахт, Сарвари давлат муҳтарам Эмомалӣ Раҳмон, Раиси Маҷлиси миллии Маҷлиси Олӣ, раиси шаҳри Душанбе Рустами Эмомалӣ, Сарвазири Ҷумҳурии Тоҷикистон Қоҳир Расулзода ва Раиси Маҷлиси намояндагон Маҳмадтоир Зокирзода бо рафти сохтмони Майдони “Истиқлол” шинос шуданд.

Дар идомаи раванди созандагиҳо дар шаҳри Душанбе бунёди Майдони “Истиқлол” бо Маҷмааи меъмории рамзи “Истиқлол ва Озодӣ” аз пешрафту шукуфоӣ ва рушду нумуи мамлакат шаҳодат медиҳад. Майдони “Истиқлол” бо маҷмааи рамзи истиқлолу озодӣ, ки аз иншооти асосии боғ маҳсуб меёбад, соли 2022 ба истифода дода мешавад.

Бунёди майдон таҳти назорати доимии Президенти мамлакат қарор дорад, аз ин рӯ, Пешвои миллат муҳтарам Эмомалӣ Раҳмон зимни шиносоӣ бо ҷараёни сохтмон таваҷҷуҳи роҳбарияти Мақомоти иҷроияи ҳокимияти давлатии шаҳри Душанберо ба муҳлати иҷрои корҳо, сифати масолеҳи сохтмонӣ ва вусъат бахшидани дигар тадбирҳои ободонӣ ҷалб карданд.