Ҷашн гирифтани Рӯзи Президенти Ҷумҳурии Тоҷикистон дарки мазмуни баланду аҳамияти калидии ин ниҳоди давлатӣ дар ҳифзу тараққии давлатдории миллии мо ва қадрдони арзишҳои баланди давлатмеҳварие мебошанд, ки Президенти Ҷумҳурии Тоҷикистон ҳамчун кафили конститутсионии онҳо фаъолият мекунад.

Ин ҷашн дар канори дигар санаҳои таърихӣ барои мардуми кишвари мо аҳамияти хоса дорад. Зеро замоне буд, ки мо низ мисли бархе кишварҳои даргири сайёра ё дар ҳоли ҷанг вазъи сангину мураккабе доштем. Вале ба иқболи баланди халқи тоҷик Сарвари хирадманде дар шахсияти Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масъулияти идораи давлатро бар дӯш гирифта, бар ивази ҷонбозиҳо оташи ҷангро хомӯш ва сулҳу ваҳдатро пойдо намуданд. Аз ин рӯ, бо мақсади эҳтирому эътирофи фазилати сиёсатмадориву давлатдорӣ, таъмини сулҳу ҳамбастагӣ, болоравии обрӯву нуфузи Тоҷикистон дар арсаи байналмилалӣ, ки ҳамаи он бо заҳматҳои босамари Сарвари давлат ба даст омадаанд, дар қонунгузории кишвар 16 ноябр ҳамчун Рӯзи Президент таҷлил мегардад. 

Ҳоло мо аз вусъати ободкориҳо ва фазои орому осудаи кишвари худ, ки тули 30 сол ба он шарафёб гардидем, ифтихор мекунем. Аз таҷдид, бунёди роҳу пул ва нақбҳо, ки Тоҷикистонро аз бунбасти коммуникатсионӣ раҳо бахшид мегӯему, перомуни ислоҳот дар соҳаҳои гуногун ва рушди бонизоми кишвари азизамон ҳарф мезанем, ки ҳама аз файзи сиёсати созандаи Пешвои миллат муҳтарам Эмомалӣ Раҳмон мебошанд.

Аз ин рӯ, ҷашн гирифтани Рӯзи Президенти Ҷумҳурии Тоҷикистон ба маънои ҷашни пирӯзии миллат, рӯзи худшиносиву худогоҳӣ, ягонагӣ  ва пойдориву устувории давлат мебошад.

 

Заррина ШОНАЗАРОВА, 

сармутахассиси  Суди конститутсионии

Ҷумҳурии Тоҷикистон