Павловния яке аз рустаниҳои нодирест, ки дар табиат зиёда аз 20 намуди он вомехӯрад.  Машҳуртаринашон ҳисгар, элонгата, фолбин, кавакамия, каталпифолия, тайван ва фаргесия мебошанд. 

Бояд гуфт, ки павловния аз дарахтони дигар бо баргҳои азим (қутраш то 80 см), гулҳои калони асалдор, ки метавонанд рангҳои гуногун дошта бошанд, тоҷи калон ва қутри зиёда аз 1 метр ва баландии 30 метр ба куллӣ фарқ карда, ба ҳамаи намуди хок ва ҳарорати ҳаво (45 гармӣ ва  30 дараҷа хунукӣ) тобовар аст. Дар Чин, ки ватани павловния ба ҳисоб меравад, дар майдони беш аз 2 миллион гектар парвариш меёбад. 

Яке аз ҷолибтарин хусусиятҳои павловния он аст, ки пас аз ҳар як буридан боз афзоиш меёбад. Онро якчанд маротиба (то 7 – 8 бор) буридан мумкин аст. То 100 сол умр мебинаду чӯбаш хеле сабук аст.

Дарахт дар фасли баҳор гул мекунаду бӯйи гуворо дорад. 

Системаи решаи павловния патакреша буда, одатан, дар умқи 1 – 1,5 метр қад мекашад ва тиррешааш ба 8– 9 метр мерасад. Аз ин рӯ, павловния барои мустаҳкам кардани хокҳои минтақаҳои зери хатари эрозия ва ярч  мусоид аст. Дарахти павловния босуръат афзоиш меёбад. Бо фароҳам овардани шароити мусоид дар 4 – 5 сол ба 15 метр мерасад.

Мавриди зикр аст, ки иқлими Тоҷикистон барои парвариши дарахти павловния басо мувофиқ мебошад.

Зикри чанд хусусияти павловнияро ин ҷо зарур мешуморем:

- хосияти хуби гарминигоҳдорӣ дорад;

- чӯбаш дар ҳарорати зиёда аз 400 дараҷа гармӣ месӯзад; 

- шакл ва андозаашро тағйир намедиҳад, намепӯсад;

- ба он ҳашаротҳо ва паразитҳо зарар намерасонанд, ки ин парваришро осон ва истифодаи заҳрхимикатҳоро талаб намекунад;

- танаи рост дорад;

- баргҳояш дар соли аввал хеле калон ва нахдор мешаванд (паҳнои онҳо то 80 – 90 см мерасад), онҳо аз сафедаҳо (зиёда аз 20 дарсад) ва микроэлементҳо бойанд. Аз ин лиҳоз, барги онро аксар вақт барои хӯроки чорво истифода мебаранд; 

- асалаш қиматбаҳо буда, метавон аз ҳар гектар беш аз 500 кг гирифт.

- павловния ҳаворо аз газҳои зараровар тоза мекунад. Ин барои шаҳрҳои калони саноатӣ хеле муҳим аст. Он нисбат ба дигар намуди дарахтон даҳ маротиба бештар гази карбонро ҷаббида, дар раванди фотосинтез миқдори зиёди оксиген ҷудо мекунад.

- метавонад дар хокҳои металлҳои вазнин ва моддаҳои заҳролуддошта парвариш ёбад. Бо ҷаббидани моддаҳои заҳролуд хок ва оби заминро тоза мекунад.

 

Алиаскар ЗОИРОВ, 

ёрдамчии директори 

Агентии хоҷагии 

ҷангали назди Ҳукумати 

Ҷумҳурии Тоҷикистон