Раиси Бонки миллии Тоҷикистон Ҳоким Холиқзода сафири фавқулода ва мухтори Подшоҳии Арабистони Саудӣ дар Ҷумҳурии Тоҷикистон Валид ибни Абдураҳмон ар-Решайданро ба ҳузур пазируфт.

Ҳоким Холиқзода зикр кард, ки новобаста аз пайомадҳои пандемияи COVID-19 ба иқтисодиёти миллӣ, Тоҷикистон тавонист тавассути андешидани тадбирҳо рушди воқеии иқтисодиётро таъмин намояд. Натиҷаи чораҳои андешида буд, ки маҷмуи маҳсулоти дохилии кишвар дар давраи моҳҳои январ - октябри соли ҷорӣ 78,9 миллиард сомонӣ ва афзоиши воқеии он 9,0 фоизро ташкил намуд ва рушди он нисбат ба ҳамин давраи соли гузашта 4,8 банди фоизӣ зиёд мебошад. Зимни мулоқот, вобаста ба таҳияи лоиҳаи “Ёддошти тафоҳуми ҳамкорӣ миёни Бонки миллии Тоҷикистон ва Агентии монетарии Подшоҳии Арабистони Саудӣ” ва тезондани имзои “Ёддошти тафоҳум байни Департаменти мониторинги молиявии назди Бонки миллии Тоҷикистон ва Воҳиди кашшофии молиявии Арабистони Саудӣ оид ба ҳамкорӣ дар соҳаи мубодилаи иттилооти мақомоти кашшофии молиявӣ вобаста ба муқовимат бар зидди софкории пул, маблағгузории терроризм ва ҷиноятҳои ба онҳо алоқаманд” низ табодули афкор сурат гирифт.

“Дар баробари ворид гардидани тағйиру иловаҳо ба Кодекси андози Ҷумҳурии Тоҷикистон барои сармоягузорӣ ва рушди тиҷорат дар кишвар шароити боз ҳам беҳтар фароҳам оварда шуд. Махсусан, барои ҷалби сармоягузорӣ ҷиҳати ба роҳ мондани фаъолияти бонкдорӣ, аз ҷумла бонкдории исломӣ имкониятҳои васеъ пешбинӣ шудаанд. Аз ин лиҳоз, тақвият бахшидани ҳамкорӣ миёни бонкҳои марказӣ ва тиҷоратии ду кишвар ба манфиат хоҳад буд”, - гуфт Ҳоким Холиқзода.

Сафири фавқулода ва мухтори Подшоҳии Арабистони Саудӣ дар Ҷумҳурии Тоҷикистон ҷаноби Валид ибни Абдураҳмон ар-Решайдан аз фаъолияти Ҳукумати Ҷумҳурии Тоҷикистон ва Бонки миллии Тоҷикистон дар самти бартараф намудани пайомадҳои пандемия ва таъмини рушди иқтисодии кишвар ҳарф зада, иброз дошт, ки Подшоҳии Арабистони Саудӣ хоҳони тақвияти бештари муносибатҳои тиҷоратӣ бо Ҷумҳурии Тоҷикистон мебошад.

Дар ҷараёни мулоқот, ҳамчунин, масоили мубодилаи иттилоот байни бонкҳои марказӣ, бозомӯзии кормандони низоми бонкии ду кишвар ва рушди бозори суғурта мавриди баррасӣ қарор гирифтанд ва ҷонибҳо омодагии худро барои тақвияти ҳамкориҳои мутақобилан судманд ва равобити иқтисодиву тиҷоратӣ дар самти рушди низоми бонкӣ иброз намуданд.

 

Муҳаммадзоиршо ШАРИФЗОДА,

“Ҷумҳурият”