Ҳанс Бае Ки, директори техникии ширкати «ҲансБиотех», роҳбари ҳайати сармоягузорони Корея, изҳор дошт, ки омодаем дар соҳаҳои саноат, технологияҳои иттилоотию коммуникатсионӣ, сайёҳӣ, тиб ва хизматрасонӣ ба таври шарикӣ лоиҳаҳои нави афзалдоштаро татбиқ намоем. 

- Давоми чанд рӯзе, ки мо – соҳибкорону сармоягузорони Корея дар доираи форум аз гӯшаю канори Тоҷикистон боздид намудем, хуб дарк кардем, ки Тоҷикистон имкониятҳои фаровони сармоягузорӣ дорад. Ба ин асос, ҷиҳати тавсеаи ҳамкориҳои иқтисодию  тиҷоратӣ бо соҳибкорони тоҷик боз ҳам ҳавасмандии мо афзуд. Ин вохӯрӣ ба рушди муносибатҳои ду мамлакати дӯст такони ҷиддӣ хоҳад бахшид,- иброз дошт ӯ. 

Дар форум, ҳамзамон, Саъдӣ Қодирзода, раиси Кумитаи давлатии сармоягузорӣ ва идораи амволи давлатӣ, Шералӣ Кабир, вазири саноат ва технологияҳои нав, Абдураҳмон Абдураҳмонзода, муовини вазири рушди иқтисод ва савдо, Ҷамшед Ҷумъахонзода, раиси Палатаи савдо ва саноат,  доир ба имкониятҳои сармоягузории ду кишвар, инчунин, тавофуқоти то ин дам байни соҳибкорон ҳосилшуда сухан ронданд. 

Ба гуфтаи Абдураҳмон Абдураҳмонзода, сарфи назар аз таъсири пандемияи COVID – 19 гардиши савдо байни Тоҷикистону Корея танҳо тайи даҳ моҳи соли равон зиёда аз 50 миллион доллари ИМА-ро ташкил дод. Аммо ин нишондиҳанда дар муқоиса  ба иқтидорҳои истифоданашуда хеле кам аст. Мо метавонем дар бахшҳои энергетика, кишоварзӣ, муҳоҷирати меҳнатӣ,  сайёҳӣ, дорусозӣ, коркарди маъдан ва ғайра ҳамкории густурда дошта бошем.