Ғайриинтизор соли 2018 Майсарахон Қандова ва Муродшо Шоев вориди манзили истиқоматии ман шуда, иҷоранишини манзил Иброҳим Наботзодаро худсарона аз хона пеш кардаанд. Онҳо чунин амали ғайриқонунии худро ба он нисбат доданд, ки гӯё манзили мавриди баҳс бо пули бародарам Соиб Қандов барои онҳо харида шудааст. Ғосибони манзили истиқоматиам болои ин корашон нисбат ба ман таҳдиду таҳқир намуда, ҳатто мавриди лату куб қарор доданд, ки дигарбора аз дари ин хона надароям. Аз рӯйи ин амал, ман ба нозири минтақавӣ ва кормандони минтақавии № 112-и муассисаи минтақавии идоракунӣ ва хизматрасонии фонди манзил дар ноҳияи Сино муроҷиат кардам. Онҳо ҳолати корро санҷида муайян карданд, ки соҳибмулки қонунии манзил ман ҳастам, аз ин рӯ, аз М. Қандова ва М. Шоев талаб карданд, ки хонаро холӣ намоянд. Вале ин ду нафар, ки ниёз ба манзили истиқоматӣ надоранд ба талаби шахсони салоҳиятдор гӯш надода, гуфтанд, ки санади судӣ оварда нишон деҳ, пас аз он мо хонаро холӣ мекунем.

Маҷбур шудам, ки барои ҳалли қонунии ин баҳс ба суд муроҷиат намоям. Суди ноҳияи Сино 15 феврали соли 2021 даъвои маро дар намояндагии Ҷамшед Амиралиев бо ҷавобгарии Майсара Қандова, ҳамҷавобгарон Муродшо Шоев, Инобат Қандова дар бораи кӯчондан аз манзили истиқоматӣ бидуни додани дигар манзили истиқоматӣ қонеъ кард. Вале ҷониби дигари баҳс ба ин ҳалнома розӣ нашуда, аз болои он шикояти кассатсионӣ пешниҳод намуд. Коллегияи судӣ оид ба парвандаҳои оилавии суди шаҳри Душанбе  парвандаро аз рӯйи шикояти кассатсионии М.Шоев дар намояндагии С. Сафаров нисбат ба ҳалномаи суди ноҳияи Синоро баррасӣ намуда, онро бинобар дуруст ва қонунӣ будан беқаноат мононд. Ҳамчунин, дар марҳилаи суди назоратии шаҳри Душанбе даъвои онҳо бинобар беасос будан рад шуд. 

Мунтаҳо, ин баҳс то ба Суди Олӣ рафт ва коллегияи судӣ оид ба парвандаҳои оилавии Суди Олӣ бо сабабҳои норӯшане ҳалномаи суди ноҳияи Сино ва қарори коллегияи судӣ оид парвандаҳои оилавии суди шаҳри Душанбе  аз 25 майи соли 2021-ро бекор кард.

Суди зинаи якум, марҳилаи кассатсионӣ, назоратӣ масъаларо аз рӯйи қонун баррасӣ намуда, баҳсро одилона ҳал карданд. Вале Суди Олӣ ҳангоми баррасии парвандаи гражданӣ таҳти раисии Ш. Ализода ин ҳама ваҷҳоро ба инобат нагирифт ва шикояти назоратии тарафи дигари баҳсро бидуни иштироки мо қонеъ карда, бо қабули ҳалномаи нав санадҳои судии суди поёниро бекор намуд. Суди Олӣ далел овардааст, ки гӯё Майсара Қандова, Соиб Қандов, Инобат Қандова ва Муродшо Шоев, сокинони доимӣ дар ин манзили баҳсӣ ҳастанд. Вале тавре дар оғоз гуфтам, онҳо на сокини доимӣ балки худсарона хонаи манро ғасб намудаанд. Далели дигари носанҷида ин аст, ки гӯё Майсара Қандова маъюб мебошад, вале дар асл маъюб нест, ки ман барои исбот намудани ин воқеият санадҳо дорам.

Бо вуҷуди ин ҳама, ман ҳамчун як шаҳрванд ба тантанаи адолат бовар дорам, аз ин рӯ ба унвонии рӯзномаи «Ҷумҳурият» навиштам, то масъала мавриди таваҷҷуҳ қарор гирифта, ҳақ ба ҳақдор расонда шавад.