Набудани ниқоби тиббӣ ва маводи антисептикӣ мушкили асосии Муассисаи шабакаҳои кумаки аввалияи тиббию санитарии ноҳияи Ховалинг ба ҳисоб меравад. 

Самариддин Каримов, сарвари муассисаи мазкур иттилоъ дод, ки чанд муддат аст, онҳоро тамоман бо ниқоби тиббии муҳофизатӣ ва маводи безараргардонӣ таъмин намекунанд. Мавсуф зикр кард, ки кормандони муассиса бо пули худашон маводи заруриро харидорӣ менамоянд. Масъулони раёсати тандурустии минтақаи Кӯлоб аз ҷой доштани ин мушкилӣ воқифанд, вале дар ислоҳи он бетарафӣ зоҳир менамоянд.  

Бояд зикр намуд, ки яке аз мушкилоти дигари ҳалталаби соҳа норасоии мутахассисон дар КАТС мебошад. Ин ҳолат масъулони соҳаро ба ташвиш овардааст. Иброҳим Раҷабов, муовини роҳбари шабакаҳои КАТС дар ин бора иброз намуд, ки дар тобеияти муассиса 20 маркази саломатии деҳот ва 12  бунгоҳи тиббӣ мавҷуд аст. Алҳол ду бунгоҳи тиббӣ: яке дар Ҷамоати деҳоти Лоҳутӣ, деҳаи Арғонак, дигаре дар Ҷамоати деҳоти Ҷонбахт, дараи “Ҳавз” дар хонаҳои истиқоматӣ фаъолият доранд. Соли гузашта ҳашт нафар табиби марказ бо хоҳиши худ аз кор рафтанд. Айни замон дар муассисаҳои назди КАТС 20 табиби самтҳои асосӣ намерасад.

Ба гуфтаи мутасаддиён дар давраи авҷи бемории коронавирус бо сабаби набудани табиби сироятшинос маҷбур шудаанд, ки табибони оилавиро ба фаъолияти сироятшиносӣ ҷалб намоянд. Норасоии 40 табиби маълумоти олидор ва беш аз 25 корманди миёнаи тиббӣ масуълони ноҳияро нигарон кардааст. Соҳаи тандурустии ноҳия ба духтурони гӯшу гулую бинӣ, момодоя, амрози даруна, сироятшинос эҳтиёҷ дорад.

 

Суннати СОДИҚ, «Ҷумҳурият»