Лента.ру. Президенти Финляндия Саули Ниинис-те бо ҳамтои фаронсавиаш  Эммануэл Макрон гуфтугӯи телефонӣ анҷом дод.   

Сарварони давлатҳо авзоъ дар атрофи Украина ва амнияти Аврупоро   баррасӣ карда, ҳамчунин,  бар  муҳимияти муколама бо Россия таъкид намуданд. "Муҳим аст, ки овози Аврупо дар ҷараёни муҳокимаҳо ба таври возеҳ шунида шавад", - гуфта мешавад дар изҳорот.  

Сарварони Финляндия ва Фаронса  ҳамкориҳои амниятӣ дар Иттиҳоди Аврупо ва ҳамкориҳои наздик бо Иёлоти Муттаҳидаи Амрикоро низ баррасӣ карданд.

 

Таҳримҳои нави  ИМА  алайҳи  Россия  метавонад боиси қатъи равобити ду кишвар гардад  

 

INTERFAX.RU.  Таҳримҳои нави ИМА  бар зидди Маскав, аз ҷумла алайҳи раҳбарияти Федератсияи Россия метавонанд боиси қатъи  пурраи равобити ду кишвар гарданд,- гуфт сухангӯи Президенти Россия Дмитрий Песков дар мусоҳиба бо CNN.

«Ин аз фаҳмиши мо берун аст. Эҳтимол, чунин таҳримҳо боиси қатъи ҳама гуна равобити байни ду кишвар шаванд, ки ба нафъи ягон ҷониб нест. Дар ҳар сурат, ин иштибоҳи азим хоҳад буд», - гуфт Песков.  

 Дар идома Песков таъкид кард, ки Федератсияи Россия  кишвари паҳновару худкифо аст ва таҳримоти ИМА наметавонанд ба он зарар расонанд.

 

Пешниҳоди Дабири кулли НАТО ба Россия  

Europe Asia Daily. Дабири кулли НАТО Йенс Столтенберг гуфт, ки НАТО Россияро барои баргузории як силсила мулоқотҳо оид ба амнияти Аврупо, аз ҷумла вазъи атрофи Украина, даъват кардааст, аммо то ҳол посух нагирифтааст.

Музокироти ҳайати Россия бо намояндагони ҳамаи 30 кишвари узви НАТО рӯзи чаҳоршанбеи гузашта дар Брюссел баргузор гардид, вале бидуни тавофуқ барои идомаи муколама поён ёфт. Столтенберг дар мусоҳиба бо шабакаи телевизионии Канада CBC гуфт: "Мо пешниҳоди баргузории як силсила мулоқотҳоро дар мавзуъҳои муҳим барои амнияти Аврупо, вазъ дар Украина ва атрофи он ба миён гузоштем."

Ба гуфтаи ӯ, мавзуъҳои мулоқотҳои нав бо Россия, метавонанд назорати аслиҳа, шаффофияти фаъолиятҳои низомӣ, тадбирҳои таҳкими эътимод бошанд.

«Россия гуфтааст, ки барои посух додан ба ин пешниҳодҳо фурсат лозим аст ва ҳоло мо посухи Россияро интизорем" , - гуфт Столтенберг.

 

Салливан иқдомҳои нави дипломатии ИМА дар музокирот бо Россияро эълон кард

RT.  Ҷейк Салливан, мушовири президенти ИМА оид ба амнияти миллӣ хабар дод, ки Вашингтон метавонад,  аввалҳои ҳафта дар бораи иқдомоти дипломатии минбаъда дар муносибат бо  Россия маълумоти иловагӣ пешниҳод намояд.  

Қаблан Дмитрий Песков, сухангӯи  Президенти  Россия гуфт, ки Маскав баёнияи тезутунди Вашингтон дар атрофи музокироти Россияву Амрикоро оид ба кафолатҳои амниятӣ мушоҳида мекунад.

Вай афзуд, Маскав азми идомаи муколама бо Иёлоти Муттаҳидаи Амрикоро дорад, аммо ҳадафи он, расидан ба натиҷаҳои мушаххас мебошад.