Раиси вилояти Суғд Раҷаббой Аҳмадзода зимни сафари корӣ ба ноҳияи Мастчоҳ, аз  рафти таъмири пойгоҳи обкашӣ, омодагиҳо ба мавсими нави киштукор ва бунёди иншооти гуногуни иҷтимоӣ шинос гардид.

Дар минтақаҳои кишоварзии вилояти Суғд омодагӣ ба давраи нави обрасонӣ ҷараён дорад. Бо ин мақсад дар пойгоҳҳои обкашӣ корҳои омодагӣ ба мавсими нав идома дошта, дастгоҳҳо ва иншооти обрасонӣ омода карда мешавад. Аз ҷумла, дар ноҳияи Мастчоҳ таъмиру барқарорсозии пойгоҳи обкашии «Янтоқ-2» ҷараён дорад. Пойгоҳи обкашии «Янтоқ-2» 7 адад агрегат дошта, тавассути он наздик ба 5 ҳазор гектар замин обёрӣ мешавад. Айни замон корҳои таъмирии пойгоҳ 90 дарсад анҷом ёфтаанд. 

Раиси вилоят аснои шиносоӣ ба масъулони Раёсати давлатии беҳдошти замин ва обёрии вилоят, Идораи давлатии беҳдошти замин ва обёрии ноҳияи Мастчоҳ супориш дод, ки ҳамаи пойгоҳҳои обкашӣ сари вақт ба кор омода карда шаванд. 

Сипас, ба раиси вилоят нақшаи кишти пахта ва картошкаи барвақтӣ барои соли ҷорӣ муаррифӣ шуд. Чуноне иттилоъ дода шуд, имсол дар ноҳияи Мастчоҳ дар 12 ҳазору 550 гектар пахта ва 250 гектар картошкаи барвақтӣ кишт мегардад. 

Бо мақсади амалӣ намудани дастуру супоришҳои Сарвари давлат муҳтарам Эмомалӣ Раҳмон тибқи нақша соли ҷорӣ аз ҳисоби заминҳои талу тепа ҳамзамон дар майдони 50 гектар боғи нав бунёд мешавад. Раиси вилоят бо ёдоварӣ аз дастуру супоришҳои Пешвои миллат муҳтарам Эмомалӣ Раҳмон, ки аз Паём ба Маҷлиси Олӣ бармеоянд, таъкид намуд, ки дар ҳамаи шаҳру ноҳияҳои кишоварзӣ бунёди боғу токзори нав ба назар гирифта шуда, бо ин васила заминҳои аз кишт берунмонда дубора ба кишт дароварда шаванд. 

Раиси вилоят дар идомаи сафар бо фаъолияти гармхонаҳои хоҷагии деҳқонии «Мадина», Ҷамъияти дорои масъулияти маҳдуди «Суғдиён- Свердловск», сохтмони фабрикаи парандапарварӣ ва фермаи чорводорӣ, корхонаи коркарди чормағзи заминӣ, марказҳои хизматрасониву меҳмонхона шинос гардид. 

Дар поёни сафари корӣ Раҷаббой Аҳмадзода ба гузаргоҳи сарҳадии “Фотеҳобод” ташриф оварда, лоиҳаи ободонии гузаргоҳро бо масъулон баррасӣ намуд.

 

Нигина РАҲМОН, «Ҷумҳурият»