Дар қатори дигар мавзеъҳои Тоҷикистони азиз дар ноҳияи Спитамен низ бо дастгирии Ҳукумати мамлакат ва ашхоси саховатпеша як силсила иншооти варзишӣ бунёд гаштанд. 

Тавре директори муассисаи давлатии мактаби варзиши ноҳия Абдумаҷид Раҳимов, изҳор дошт, алҳол дар ноҳияи Спитамен зиёда аз 90 майдончаи варзиш, 36 толор, 3 ҳавзи шиноварӣ, муассисаи давлатии мактаби варзишӣ ва комплекси варзишӣ фаъолият менамоянд. 

Маврид ба зикр аст, ки 13 январи соли ҷорӣ бо иштироки раиси вилояти Суғд Раҷаббой Аҳмадзода дар Ҷамоати деҳоти Истиқлоли ноҳия комплекси варзишӣ мавриди истифода қарор дода шуд.

Иншоот аз ҷониби соҳибкори маҳаллӣ Акмал Юлдошев бунёд гардид ва дар он 12 сокини  маҳаллӣ бо ҷойи кори доимӣ таъмин шуд.

Бинои мазкур дуошёна буда, дорои толори машқу тамрин, ҳавзи шиноварӣ, майдончаҳои варзишии футбол, басткетбол, волейбол ва теннис мебошад.  Ҳамчунин, раиси вилоят дар суҳбат бо сокинон таъкид кард, ки татбиқи барномаҳои давлатӣ дар самти сиёсати давлатии ҷавонон ва рушди соҳаи тарбияи ҷисмонӣ имкон дод, ки дар шаҳру ноҳияҳои вилоят садҳо иншооти нави варзишӣ ба истифода дода шавад. Наврасону ҷавононро зарур аст, ки бо истифода аз шароитҳои фароҳамшуда мунтазам ба варзишу тарбияи ҷисмонӣ машғул гарданд ва саломатии худро ҳифз намоянд.

Маҳз ҳамин дастгириву ғамхориҳо мебошанд, ки тайи солҳои ахир варзишгарони ноҳия дар мусобиқаҳои гуногун ба муваффақияту комёбиҳо ноил мегарданд. Аз ҷумла, соли гузашта варзишгарони ноҳия  дар мусобиқаҳои ҷумҳуриявию байналмилалӣ 105 медали тилло,  137 нуқра ва 145 биринҷӣ ба даст оварданд.

Бино ба гуфтаи Абдумаҷид Раҳимов, ҳоло дар мактаб беш аз 820 нафар, аз ҷумла 210 духтар дар намудҳои гуногуни варзиш машқу тамрин мекунанд ва барояшон тамоми шароитҳои муосир муҳайё гаштаанд. Ӯ изҳори умед намуд, ки дар оянда низ варзишгарони ноҳия дар мусобиқаҳои гуногуни ҷумҳуриявию байналмилалӣ ширкат варзида, ба дастовардҳои назаррас мушарраф мегарданд ва, ба ин васила, барои боз ҳам боло рафтани обрӯву нуфузи Ватани маҳбубамон саҳми бориз мегузоранд. 

 

З. РАҶАБ, “Ҷумҳурият”