Россия барои дастгирии Барномаи ғизои муассисаҳои таълимӣ дар Тоҷикистон ба Барномаи озуқавории ҷаҳонии Созмони Милали Муттаҳид (WFP) 2 миллион доллари ИМА ба таври иловагӣ ҷудо менамояд. Маблағ барои хариди маводи ғизоӣ ба хонандагони тақрибан 2000 муассисаи таълимии кишвар сарф мешавад.

Дар нишасти матбуотие, ки ба ин муносибат доир шуд, вазири маориф ва илми Тоҷикистон Маҳмадюсуф Имомзода, мушовири Сафорати Россия дар Тоҷикистон Шамил Шамсутдинов, директори Барномаи озуқавории  ҷаҳонии СММ дар Тоҷикистон Адҳам Мусаллам ва намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ширкат варзиданд.

 

Мулоқот бо сафири Покистон

Муовини вазири корҳои хориҷии Ҷумҳурии Тоҷикистон Фарҳод Салим сафири фавқулода ва мухтори Ҷумҳурии Исломии Покистон дар Тоҷикистон Имрон Ҳайдарро ба ҳузур пазируфт.

Ҷонибҳо ҳолат ва дурнамои робитаҳои дуҷонибаро мавриди баррасӣ қарор дода, роҷеъ ба ҳамкориҳо дар чаҳорчӯбаи созмонҳои байналмилалӣ ва минтақавӣ табодули афкор намуданд. 

 

Тақдими нусхаи эътимоднома

Муовини вазири корҳои хориҷӣ Фарҳод Салим нусхаи эътимодномаи сафири фавқулода ва мухтори Япония дар Тоҷикистон Тошиҳиро Аикиро қабул кард.

Дар рафти мулоқот перомуни ҳолати кунунии муносибатҳои дуҷониба, дурнамои густариши ҳамкорӣ байни кишварҳо ва масъалаҳои дигари мавриди таваҷҷуҳи муштарак табодули назар сурат гирифт.

 

Вохӯрии Амирхон Қурбонзода бо кормандони соҳаи сохтмони пойтахт

Дар бинои сарраёсати меъморӣ ва шаҳрсозии шаҳри Душанбе вохӯрии муовини якуми раиси шаҳри Душанбе Амирхон Қурбонзода бо масъулони соҳаи сохтмони шаҳр вобаста ба шарҳу тавзеҳи нуктаҳои Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ баргузор гардид. 

Амирхон Қурбонзода зикр намуд, ки мақсади вохӯрӣ ин дар амал татбиқ намудани дастуру супоришҳои Президенти кишвар муҳтарам Эмомалӣ Раҳмон мебошад. Аз иштирокдорон даъват гардид, ки баҳри ободии пойтахти кишвари азизамон - шаҳри Душанбе саҳмгузор бошанд.

 

30 январ Иди Сада таҷлил мегардад

Чорабинӣ дар Боғи фарҳангӣ - фароғатии ба номи Абулқосим Фирдавсии шаҳри Душанбе бо намоиши ниҳолҳою тухмии зироатҳои кишоварзӣ баргузор мегардад. Тавре аз Вазорати кишоварзӣ  иттилоъ доданд,  дар ин рӯз аз ҷониби вазорат тақдими ҷоизаҳо ба фаъолони соҳа дар назар аст.

Дар ин рӯз афрӯхтани гулханҳо, ташкили гӯшаи тавсияи олимону мутахассисон оид ба омодагӣ ба киштукори баҳорӣ, намоиши ҳама гуна олоти кишоварзӣ, хони пурнозу неъмат, муаррифии ҳунарҳои мардумӣ ва қаламчаҳои ниҳолони хоҷагиҳои ниҳолу тухмипарвар, намоиш ва фурӯши ниҳолҳои мевадиҳандаву сояафкан, гулу буттаҳои ҳамешасабзи ороишӣ дар назар аст.

 

Ҷаласаи гурӯҳи коршиносони Платформаи миллӣ

Дар Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон таҳти роҳбарии сардори сарраёсати кумита, полковник Ҷамшед Камолов ҷаласаи доимоамалкунандаи гурӯҳи коршиносони Платформаи миллии Ҷумҳурии Тоҷикистон оид ба коҳиши хатари офатҳо баргузор шуд. Дар он намояндагони 15 вазорату идора иштирок доштанд.

Дар ҷаласа, аз ҷумла иштирокчиён масъалаҳои пешгӯии ҳолатҳои фавқулода, бехатарии ҳаракати роҳҳо дар минтақаҳои тармафароӣ ва омодагӣ ба офатҳои табиӣ дар фаслҳои зимистону баҳори соли 2022-ро баррасӣ карданд.

 

Моҳи феврал боришоти зиёд пешгӯйӣ мешавад

Моҳи феврали соли равон дар ҷумҳурӣ бориши зиёди борон, барф ва барфи тар  пешгӯйӣ  мешавад. 

Дар ин бора муовини директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Ҷамила Байдуллоева ба АМИТ «Ховар» иттилоъ додааст.