Дар робита ба ин, раёсати Агентии меҳнат ва шуғли аҳолӣ дар вилояти Суғд фаъолияти худро дар асоси Қонуни Ҷумҳурии Тоҷикистон «Дар бораи мусоидат ба шуғли аҳолӣ» ва Барномаи давлатии мусоидат ба шуғли аҳолии Ҷумҳурии Тоҷикистон  барои солҳои 2020 – 2022 ба роҳ монда, дар якҷоягӣ бо сохторҳои дахлдор, соли гузашта корҳои муайянро ба анҷом расонд. 

– Соли сипаришуда ба мақомоти меҳнат ва шуғли аҳолӣ дар вилоят 43 150 шаҳрванд муроҷиат кард ва бо мусоидати онҳо 20 ҳазору 290 корҷӯ соҳиби ҷойи кори доимӣ, мавсимӣ ва муваққатӣ  гардид, – гуфт ба хабарнигори рӯзномаи “Ҷумҳурият” сардори раёсати агентӣ Шермуҳаммад  Нодирӣ ва илова кард. 

Яке аз самтҳои дигари фаъолияти мақомот, таъсиси ҷойҳои нави кор тавассути рушди фаъолияти соҳибкории хурду миёна мебошад. Бо ин мақсад, ба 881 бекор ба маблағи беш аз 2 миллиону 918 ҳазор сомонӣ қарзи имтиёзнок дода шуд.

Ҷиҳати бо кор таъмин намудани шаҳрвандон дар фаъолияти мақомоти меҳнат ва шуғли аҳолӣ ташкил ва гузарондани ярмаркаҳои ҷойҳои кори холӣ нақши муҳим дорад. Шермуҳаммад  Нодирӣ афзуд, ки соли гузашта дар вилоят 269 ярмаркаи ҷойҳои кории холӣ ва вазифаҳои озод баргузор гашт. Дар натиҷа, 2052 нафар бо ҷойи кори доимӣ, мавсимӣ ва муваққатӣ таъмин шуда, 452 нафар ба корҳои ҷамъиятии музднок сафарбар гардид ва 1713 нафар барои касбомӯзӣ роҳхат гирифт.

– Самти дигари фаъолияти мақомоти давлатии меҳнат ва шуғли аҳолӣ таъину пардохти ёрипулӣ ба бекорон мебошад. Соли сипаришуда, тибқи муқаррароти санадҳои меъёрию ҳуқуқии соҳа, 4263 кас дар маҷмуъ ба маблағи беш аз 1 миллиону 784 ҳазор сомонӣ ёрипулӣ гирифт,– иброз дошт Шермуҳаммад Нодирӣ.

Инчунин, соли гузашта ба мақомоти меҳнат ва шуғли аҳолии шаҳру ноҳияҳо 725 кас аз муассисаҳои иҷрои ҷазои ҷиноятӣ озодгардида муроҷиат намуданд, ки 170 нафараш бо кор таъмин ва ба 540 каси дигар ёрипулӣ таъин гашта,  5 нафар барои  касбомӯзӣ равона шуд.

– Мақомоти давлатии меҳнат ва шуғли аҳолии вилояти Суғд ҷиҳати дар сатҳи зарурӣ амалӣ намудани Барномаи давлатии мусоидат ба шуғли аҳолии Ҷумҳурии Тоҷикистон дар соли 2022 ва иҷрои саривақтии дастуру ҳидоятҳои роҳбарияти олии мамлакат  аз тамоми имкониятҳои мавҷуда самаранок истифода мебаранд,– гуфт дар охир Шермуҳаммад Нодирӣ.