ТАСС. Қосим-Жомарт Токаев, Президенти Қазоқистон, дар нишасти онлайнии сарварони кишварҳои Осиёи Марказӣ ва Чин суханронӣ карда, чунин изҳор дошт:  «Дар рӯзҳои аввали моҳи январ Қазоқистон бо  ҳамлаи бераҳмонаву  бесобиқаи террорис-тон ва ҷангҷӯён  рӯ ба рӯ шуд.

Мардуми Қазоқистон кумаки Чин ва мамлакатҳои ба мо бародари  Осиёи Марказиро бо миннатдорӣ қабул кард. Мо ҳамчун давлат, миллат аз ин ҳодисаҳои фоҷиавӣ дарси зарурӣ гирифтем ва,  бешубҳа, зуд  бақарор мешавем».

Ӯ зикр кард, ки ҳоло  ҳукуматдорони кишвар дар самти бозсозӣ ва ислоҳоти идоракунии давлатӣ, низоми амнияти миллӣ ва сиёсати иқтисодӣ фаъолона кор мебаранд. «Ҳамин тариқ, мо ба сохтмони Қазоқистони нав шуруъ кардем», - таъкид кард Сарвари давлат.

 

Сафири Россия дар Чин: «Назари Маскав ва Пекин дар бораи сабабҳои буҳрони Қазоқистон бо ҳам мувофиқанд»

 

ТАСС. Андрей Денисов,  сафири Россия дар Чин,  зимни як нишасти хабарӣ изҳор дошт, ки дидгоҳи Маскав ва Пекин дар бораи сабабҳои буҳрони Қазоқистон ва роҳҳои баромадан аз он бо ҳам мувофиқанд.   

Сафир ёдовар шуд, ки  тезутундшавии  вазъ дар Қазоқистон то андозае барои ҳамаи кишварҳои дӯст ва ҳамсояи  ин мамлакат ғайричашмдошт буд.  "Вокуниши Федератсияи Россия, Чин ва Созмони ҳамкории Шанхай, ки кишварҳои мо дар он аъзои фаъол ҳастанд, дар маҷмуъ, саривақтӣ ва  якхела буд. Ин мавқеи мо ҷиҳати ба эътидол овардани вазъи  Қазоқистон нақши муҳим бозид, зеро Чин, Россия ва Созмони ҳамкории Шанхай аз роҳбарият,  Президенти  Ҷумҳурии Қазоқистон дар талоши ҳарчи зудтар  баромадан аз ин буҳрон  дастгирӣ карданд", - гуфт Андрей Денисов.

 

Парламенти Фаронса  масъалаи аз узвияти НАТО баромадани мамлакатро ба миён гузошт

 

RT. Мишел Ларив,  узви Ассамблеяи  миллии Фаронса, изҳори назар кард, ки кишвар бояд аз  узвияти Эътилофи Атлантикаи Шимолӣ хориҷ шавад. Вай бо чунин пешниҳод ба вазири корҳои хориҷии Фаронса Жан-Ив Ле Дриан муроҷиат кард.  

Ба гуфтаи ӯ, НАТО бояд пас аз анҷоми «ҷанги сард»  аз байн мерафт. Ба ҷои ин,  тули 30 соли охир  ҳайати он тавсеа меёбад. Сиёсатмадор ёдовар шуд, ки  эътилофи низомӣ, аз ҷумла дар Балкан, Афғонистон ва Либия, амалиёт анҷом додааст ва ин амалҳо на сулҳ дар ҷаҳон ва на амнияти Фаронсаро кафолат надоданд.

«Фаронса бо пайвастан ба  созмони ҷангҷӯ, ки алайҳи Чин ва Россия нигаронда шудааст, умуман, манфиатдор нест», - афзуд Ларив. 

 

Сирояти бесобиқа ба COVID-19 дар ҷаҳон

 

ТАСС. Давоми як ҳафтаи охир дар ҷаҳон беш аз 21 миллион нафар ба бемории коронавирус мубтало шуд, ки ин ҳадди аксарро дар тули тамоми давраи пандемия нишон медиҳад. Созмони ҷаҳонии тандурустӣ  шаби чаҳоршанбе дар Женева гуфт, ки шумори ҳолатҳои ошкоршудаи сироят дар муқоиса бо ҳафт рӯзи қаблӣ 5 ва фавт 1 дарсад афзудааст. Дар Аврупо шумораи одамоне, ки  ҳафтаи ахир  сироят ёфтаанд, аз 10 миллион нафар гузашт ва 47 дарсади тамоми сироятҳои нав дар ҷаҳонро ташкил медиҳад.  Тибқи маълумоти  СҶТ, то 25 январ дар ҷаҳон аз оғози пандемия 352 796 704 нафар сироят ёфта, 5 600 434 нафар фавтидааст.