Дар ҷаласаи васеи Бонки миллии Тоҷикистон, ки бо иштироки намояндаи Дастгоҳи иҷроияи Президенти Ҷумҳурии Тоҷикистон ва роҳбарони ташкилотҳои қарзии молиявӣ баргузор гардид, натиҷаҳои фаъолияти низоми бонкии мамлакат дар соли 2021 мавриди баррасӣ қарор гирифта, нақшаҳо барои соли 2022 муайян гардиданд. 

Раиси БМТ Ҳоким Холиқзода иброз дошт, ки Бонки миллии Тоҷикистон ҷиҳати дар амал татбиқ намудани дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қонунҳои мавриди амали ҷумҳурӣ ва қарорҳои Ҳукумати мамлакат ҷиҳати татбиқи босамари сиёсати пулию қарзӣ, таҳкими низоми бонкӣ, мусоидат намудан ба таъмини суботи молиявӣ, рушди устувори иқтисодиёти миллӣ ва пешгирии пайомадҳои манфии пандемияи коронавирус (COVID-19) ба иқтисодиёт ва низоми молиявии кишвар, инчунин, ноил гардидан ба нишондиҳандаҳои назаррас пайваста тадбирҳои амалӣ меандешад. 

Натиҷаи андешидани тадбирҳои саривақтӣ буд, ки ҳаҷми маҷмуи маҳсулоти дохилии кишвар (ММД) дар соли 2021, то ба 99,0 миллиард сомонӣ расида, рушди воқеии он ба беш аз 9,2 фоиз баробар гардид. Сатҳи таваррум бошад, дар соли 2021 8,0 фоизро ташкил намуда, нисбат ба соли 2020 ба андозаи 1,4 банди фоизӣ паст гардидааст. 

Дар давраи ҳисоботӣ шумораи ташкилотҳои қарзии молиявӣ дар ҳудуди кишвар ба 63 ва воҳидҳои сохтории онҳо ба 1852 расид, ҳаҷми пасандозҳо ба 10 миллиард сомонӣ ва ҳаҷми умумии қарзҳои додашуда ба 13,7 миллиард сомонӣ баробар шуд, ки 37 фоиз ба соҳибкории истеҳсолӣ, боқимондаи он ба соҳаҳои кишоварзӣ, саноат, хизматрасонӣ, сохтмон ва ғайра равона гардиданд. 

Бонки миллии Тоҷикистон ҷиҳати татбиқи сиёсати пулию қарзӣ ва таъмини устувории низоми бонкӣ дар ҳамкорӣ бо дигар ниҳодҳои иқтисодии кишвар тамоми чораҳои заруриро андешида, раванди ислоҳоти соҳаи бонкдориро бо мақсади баланд бардоштани рушди иқтисодию иҷтимоии кишвар идома хоҳад дод. 

Дар баробари ин, роҳбарони сохторҳои масъули бонк оид ба самтҳои алоҳида, аз ҷумла татбиқи босамари сиёсати пулию қарзӣ ва асъорӣ, устувории суботи молиявӣ, вазъи низомҳои иттилоотӣ, татбиқи самараноки низоми пардохт, муқовимат ба қонунигардонии (расмикунонии) даромадҳои бо роҳи ҷиноят бадастоварда, маблағгузории терроризм ва паҳнкунии силоҳ ва ҳимояи ҳуқуқҳои истеъмолкунандагони хизматрасониҳои молиявӣ рӯнамоии худро манзури аҳли нишаст гардонданд. 

Муовини Роҳбари Дастгоҳи иҷроияи Президенти Ҷумҳурии Тоҷикистон Абдураҳмон Ҳалимзод оид ба вазъи низоми бонкӣ ибрози назар карда, ҷиҳати боз ҳам беҳтар гардидани фаъолияти босамар ва босуботи низоми бонкӣ пешниҳодҳои худро манзур намуд. 

Раиси Бонки миллии Тоҷикистон Ҳоким Холиқзода тазаккур дод, ки бо истифода аз имкониятҳои мавҷуда барои ҷалби сармояи дохиливу хориҷӣ ва паст кардани фоизи қарзҳо, баланд бардоштани эътимоди аҳолӣ ба низоми бонкӣ, дуруст ба роҳ мондани низоми идоракунии корпоративӣ дар ташкилотҳои қарзии молиявӣ, низоми назорати дохилӣ, комплаенс ва низоми идоракунии хавфҳо, махсусан хавфҳои амалиётӣ, ҷалби бештари сармоягузориҳо, вусъат додани ҳисоббаробаркуниҳои ғайринақдӣ, кам кардани сатҳи қарзҳои ғайрифаъол ва ба роҳ мондани ҳамкорӣ бо ташкилотҳои молиявии байналмилалӣ ва сармоягузорони дохиливу хориҷӣ диққати асосӣ дода, талаботи Қонуни Ҷумҳурии Тоҷикистон “Дар бораи авф бинобар қонунигардонии дороиҳо ва маблағҳои шаҳрвандони Ҷумҳурии Тоҷикистон”-ро сари вақт босифат таъмин намоянд ва дар таъмини рушди устувори иқтисодиёти миллӣ нақши босазо гузоранд. 

Зикр бояд кард, ки бо вазифагузорӣ ба низоми бонкӣ дар соли 2022 аз роҳбарони ташкилотҳои қарзии молиявӣ даъват ба амал оварда шуд, ки ҷиҳати иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз Паёми навбатӣ ба Маҷлиси Олии Ҷумҳурии Тоҷикистон кӯшиш ба харҷ дода, барои боз ҳам беҳтар намудани сифати хизматрасониҳои бонкӣ, ҷорӣ кардани хизматрасониҳои нави муосир ва беҳтар намудани нишондиҳандаҳои молиявӣ, афзудани ҳаҷми қарздиҳӣ ба соҳаҳои гуногуни иқтисодиёт, аз ҷумла истеҳсолкунандагони ватанӣ, ки заминаи ташкили ҷойҳои нави корӣ маҳсуб меёбанд, тадбирҳои амалӣ андешанд.

 

Муҳаммадзоиршо ШАРИФЗОДА,

«Ҷумҳурият»