Ду набераам - Шоҳмуҳаммади 5 - сола ва Алиҷони 3 - сола чанде пеш бемор шуданд. Онҳоро ба дармонгоҳи минтақавии рақами 7 -и ноҳияи Синои шаҳри Душанбе ба назди духтури бемориҳои кӯдакона Раҷабалӣ Нуралиев бурдам. 

Духтур  бо муомилаи неку суханони меҳрубонона ҳар ду кӯдакро аз муоина гузаронда, дорухат навишта, ба ман гуфт ”Апаҷон, ҳаргиз ғамгин нашавед. Фақат шумо табобатро сари вақт гузаронед. Ҳангоми зарурат ба ман занг зада, аз аҳволи кӯдакон бохабар созед”. Аз ин муносибати неки духтур Раҷабалӣ Нуралиев хурсанд шудам. Ҳамин тавр, муддати ду сол, ки набераҳоям ҳамроҳи ман буданд, борҳо бемор шудаву доимо зери назорати ин духтур қарор доштанд. Нимашабӣ ҳам, ки кӯдакон нотоб мешуданд, ба духтур занг мезадам. Барои дар ин бевақтӣ ташвиш додан  бахшиш пурсида, ҳолати онҳоро мефаҳмондам.

- Ҳеҷ гап не, апаҷон - мегуфт духтур маро таскин дода, - ҳозир ман он чӣ мефармоям, ҳатман иҷро намоед, баъдан аз натиҷааш занг занед.

Мувофиқи фармудаи духтур ба набераҳоям дору медодам. Духтур таъкид мекард, ки онҳоро наздаш барам, то ҳолаташонро муоина намояд. Чунин ҳолат борҳо такрор ёфтаанд. Боре узр пурсида, гуфтам, ки баъзан соати 11 ё 12-и шаб занг зада, шуморо ташвиш медиҳам. Духтур маро таскин дода  гуфт, ки вақте ними шаб ба ман касе занг мезанад, пеш аз ҳама, фикр мекунам, ки ӯро зарурате пеш омадааст. Ҳамин тавр, аҳволи кӯдакон то рафт беҳтар мешуду онҳо духтурро ҳамчун одами наздик дӯст доштанд.

Шукр, имрӯз саломатиашон хуб аст. Вале ман он рӯзҳои вазнини бемории онҳо ва муносибати неки вориси Синои бузург Раҷабалӣ Нуралиевро фаромӯш намекунам.                                                               

 

Файзигул  МӮСОЕВА, 

сокини ноҳияи Синои шаҳри Душанбе