Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар шарҳи ин ҳодиса иттилоъ дод, ки 27 январ тақрибан соати 17:29 ба вақти маҳаллӣ як гурӯҳи панҷоҳнафараи  шаҳрвандони номаълуми Ҷумҳурии Қирғизистон бо шумули сокинони шурои деҳаи Оқсои вилояти Бодканд дар болои пули наздикии деҳаи Хоҷаи Аъло автомашинаи тамғаи «Портер»-и шаҳрванди Ҷумҳурии Тоҷикистонро, ки рег мекашонд, маҷбуран боздоштанд. Ин дар ҳолест, ки нақлиёти мазкур аз маҳаллаи Хоҷаи Аъло то Сомониёни шаҳри Исфараи ҳудуди Ҷумҳурии Тоҷикистон ҳаракат мекард.

Ба иттилои манбаъ, бо мақсади пешгирии чунин амалҳои ғайриқонунии шаҳрвандони Ҷумҳурии Қирғизистон дар сатҳи намояндагони мақомоти маҳаллӣ ва мақомоти ҳифзи ҳуқуқи ду ҷониб вохӯрӣ ба нақша гирифта шуд. Аммо ҷониби Қирғизистон ба мулоқот наомад. Тақрибан соати 18:10 ба вақти маҳаллӣ марзбонони қирғиз, ки дар қад-қадди пули наздикии деҳаи Хоҷаи Аъло (275 метр) мавқеи оташфишониро ишғол карда буданд, ба сӯи шаҳрвандони Ҷумҳурии Тоҷикистон оташ кушоданд. 

Дар баёнияи Қӯшунҳои сарҳадии КДАМ, ки онро АМИТ «Ховар» соати 22:31-и 27 январ нашр кард, дар бораи шиддати тирборон аз ҷониби Қирғизистон ба манотиқи наздисарҳадии вилояти Бодканд интиқол додани ҷузъу томҳои ҷудогонаи ҳарбӣ ва техникаи низомӣ, ҳадаф қарор додани дидбонгоҳҳои сарҳадӣ бо истифода аз миномётҳо, сабти парвози ҳавопаймоҳои бесарнишин дар ҳарими ҳавоии Тоҷикистон хабар дода шуд.

Дар  изҳороти  дигари  Қӯшунҳои сарҳадӣ, ки 28 январи соли 2022 пахш гардид, гуфта мешавад, ки дар натиҷаи низои сарҳадӣ аз ҷониби Тоҷикистон 10 нафар захмӣ гардид, ки аз онҳо 6 нафар низомӣ ва 4 нафар сокини мулкӣ мебошанд: «Ҳамчунин, 2 нафар шаҳрванди Ҷумҳурии Тоҷикистон - Обидҷон Тӯйчиев, сокини деҳаи Хоҷаи Аъло (соли таваллудаш 1986), бар асари таркиши гулулаи миномёти низомиёни Қирғизистон дар ҳавлии номбурда ва Абдулатиф Шарипов, ронандаи шуъбаи ёрии аввалияи тиббии беморхонаи шаҳри Исфара (соли таваллудаш 1964), ҳангоми наҷоти сокинони деҳаи Хоҷаи Аъло зимни зарбаи гулулаи миномёти ҷониби Қирғизистон ба ҳалокат расиданд».

Ба иттилои манбаъ, 28 январи соли 2022, соати 01:00 дар ҳудуди Ҷамоати деҳоти Сурхи шаҳри Исфара вохӯрии гурӯҳи кории мақомоти салоҳиятдори Тоҷикистону Қирғизистон баргузор гардид. Дар ҷараёни ин дидор, баъд аз баррасиву муҳокимаи муноқишаи мусаллаҳонаи сарҳадӣ, ҷонибҳо ба мувофиқа расиданд, ки оташбас эълон гардида, то соати 08:00-и 28 январ тамоми неруҳои низомӣ, воситаҳои иловагӣ ва техникаҳои ҷангӣ аз хати Сарҳади давлатӣ ба мавқеи доимии қарордоштаашон баргардонда шаванд.

Дар ҳамин ҳол, маркази матбуоти Қӯшунҳои сарҳадии КДАМ хабар медиҳад, ки айни замон, вазъият дар Сарҳади давлатии Тоҷикистону Қирғизистон муътадил буда, сабабу омилҳои муноқишаи мусаллаҳона аз ҷониби комиссияи муштараки сохторҳои дахлдори ҳар ду ҷониб мавриди таҳқиқ қарор доранд.

 

«ҶУМҲУРИЯТ»