Хабарҳо
ТОҶИКИСТОН ВА ӮЗБЕКИСТОН. МАРКАЗИ ТИҶОРАТИИ МУШТАРАК БУНЁД МЕГАРДАД
Дар наздикии дидбонгоҳи марзии “Андархон”, воқеъ дар ноҳияи Бешариқи вилояти Фарғона, ки бо шаҳрҳои Конибодом ва Исфараи вилояти Суғд ҳаммарз аст, минтақаи озоди тиҷоратӣ бунёд мегардад.
Тибқи иттилои Дилмурод Ҷумъабоев, котиби матбуоти ҳокими Фарғонаи Ҷумҳурии Ӯзбекистон, бо ибтикори мақомоти вилоят корҳо дар ин самт оғоз шудаанд. Ин дар ҳолест, ки дидбонгоҳи марзии “Андархон” кайҳо мақоми байналмилалиро касб намуда, ҳар рӯз мусофирони зиёди Тоҷикистону Ӯзбекистон ва шаҳрвандони соири кишварҳои дуру наздик аз он убур мекунанд.
- Минтақаи озоди тиҷоратӣ дар масоҳати 5 гектар бунёд мегардад. Ҷараёни корҳои сохтмонӣ қаноатбахш буда, дар ин ҷо маҷмааи бузурги савдо дар назар аст. Ҳар як хонаи он дар ихтиёри тоҷирону соҳибкорони ду кишвари ҳамҷавор гузошта хоҳад шуд, - изҳор намуд сухангӯйи ҳокими вилояти Фарғона.
Ин ташаббус ҳамкориҳои тиҷоратии байни ду кишварро боз ҳам таҳким бахшида, иртиботи сокинони ноҳияи Бешариқи вилояти Фарғонаи Ӯзбекистон ва шаҳрҳои Конибодому Исфараи вилояти Суғди Тоҷикистонро, ки байни ҳамдигар риштаҳои ногусастании хешутаборӣ доранд, боз ҳам тақвият мебахшад.
Гулчеҳра Давлатова, корманди ҳокимияти ноҳияи Бешариқ, дар пайравии ин иқдом изҳор дошт, ки бо оғози марҳилаи нави муносиботи ҳасана байни ду кишвари ба ҳам дӯст дар соли 2018 ва боз шудани марзҳои баста ба рӯйи шаҳрвандон шодиву хурсандии мардумро ҳадду канор нест. Бунёди маркази тиҷоратии муштарак боз як қадами наве дар таҳкими дӯстиву ҳамкории тарафайн хоҳад буд, ки аз ҳадафҳои олии сарварони ду давлат аст.
Мирасрор АҲРОРОВ,
узви Иттифоқи журналистони Тоҷикистон,
шаҳри Тошканд
Баёни ақида (0) Санаи нашр: №: Мутолиа карданд: 789