Дар шаҳри Кӯлоб ба муносибати Ҷашни миллии бостонии Сада маросими идона баргузор гардид. Нахуст меҳмонон аз намоиши дастовардҳои кишоварзии ҷамоату деҳоти шаҳр, ҳунарҳои мардумӣ, дастовардҳои устодону донишҷӯёни муассисаҳои оливу миёнаи таълимӣ, самараи дастранҷи деҳқонон ва дигар ташкилоту муассисаҳои шаҳри Кӯлоб дидан намуданд. 

Намоишномаи дастовардҳои кишоварзон бозгӯи он буд, ки деҳқонони Кӯлоб дар соли 2021 ҳосили фаровон бардошта, дар таъмини амнияти озуқавории кишвар ва афзоиши ҳаҷми содироти маҳсулоти кишоварзӣ ба хориҷ саҳми арзанда гузоштаанд. Тибқи иттилоъ, дар соли сипаришуда, заҳматкашони шаҳр ба андозаи 663, 5 миллион сомонӣ маҳсулоти кишоварзӣ истеҳсол намудаанд, ки ин нишондод дар қиёс ба як соли пеш 16, 4 миллион сомонӣ зиёд мебошад. Дар ин давра аз шаҳр зиёда аз ҳазор тонна маҳсулот, аз ҷумла 955 тонна сабзавот, 81 тонна меваҷот ва 21 тонна дигар намуди маҳсулот ба хориҷи кишвар содирот шудааст. 

Салимзода Амонулло Файзулло, муовини якуми раиси вилояти Хатлон барои дар сатҳи баланд омода намудани ин намоишгоҳ ба аҳли заҳмати шаҳри Кӯлоб баҳои баланд дода, гуфт, ки бо шарофати соҳибистиқлолии кишвар мардуми Тоҷикистон аз ҷумла, сокинони Хатлонзамин ин ҷашни бостониро дар руҳияи баланди арҷгузорӣ ба мероси маънавии хеш таҷлил менамоянд. 

Қайд гардид, ки ба муносибати Иди Сада, ки ифодагари ҷовидонагии Хуршед, рамзи бедоршавии табиат, намоди оташу гармӣ, нур ва некӣ, оғози киштукор мебошад, чорабиниҳои ҷолиби фарҳангӣ намоиши ҳунарҳои мардумӣ, ярмаркаи фурӯши гулу ниҳолҳо ва дигар маҳсулоти кишоварзӣ, инчунин чорабиниҳои гуногуни варзишӣ шукӯҳу шаҳомати хосса мебахшад. 

Дар идомаи маросими идона кормандону мутахассисони фаъоли соҳаи кишоварзӣ, ҷамоату деҳот, масъулон ва кормандони ташкилоту муассисаҳои шаҳр бо ифтихорнома ва сипосномаи Мақомоти иҷроияи ҳокимияти давлатии шаҳри Кӯлоб қадр гардиданд. 

Дар охир, барномаи омоданамудаи аҳли фарҳангу санъати шаҳр ва вилояти Хатлон, ки ифодагари Иди Сада буд, пешниҳоди иштирокдорон шуд.

 

Далер ШАРИПОВ,

бахши матбуотии МИҲД-и шаҳри Кӯлоб