Соли сипаришуда дар шаҳру ноҳияҳои вилояти Хатлон 86 корхонаю коргоҳи нави саноатӣ бо фарогирии 1146 ҷойи корӣ таъсис ёфт, ки 145 дарсади нақшаи солонаро ташкил медиҳад.

 

Ба иттилои Шавкат Маҳмадализода, мудири шуъбаи энергетика ва саноати дастгоҳи раиси вилояти Хатлон, дар соли гузашта бунёду навсозии беш аз 60 корхонаву коргоҳи саноатӣ ба нақша гирифта шуда буд.

Дар ин давра дар шаҳру ноҳияҳои Ёвон, Данғара, Фархор, Бохтар, Кӯлоб, Хуросон, Норак, Темурмалик, Восеъ, Дӯстӣ, Левакант, Мир Сайид Алии Ҳамадонӣ, Абдураҳмони Ҷомӣ, Кӯшониён, Ҷалолиддини Балхӣ, Ховалинг, Панҷ, Шамсиддин Шоҳин, Балҷувон, Шаҳритус, Қубодиён, Ҷайҳун, Вахш, Муъминобод ва Носири Хусрав корхонаву коргоҳҳои саноатӣ дар самти истеҳсоли маҳсулоти хӯрокворӣ, насоҷҷӣ ва сохтмонӣ ба фаъолият шуруъ карданд.

Зимни сафари кории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳои вилояти Хатлон 21 корхонаву коргоҳи саноатӣ, аз ҷумла корхонаҳои шифербарорӣ, мебелбарорӣ ва сардхона дар Бохтар, корхонаи азими насоҷҷӣ дар Кӯлоб, корхонаҳои бандубасти асал, парандапарварӣ дар Ховалинг,  корхонаҳои равғанбарорӣ, макаронбарорӣ ва консерваи меваю сабзавот, ширӣ, қаннодӣ дар Данғара,  корхонаи шароббароии “Тоҷвайн” дар Муъминобод, коргоҳи бандубасти асал дар Балҷувон, корхонаҳои пойафзолбарорӣ, дӯзандагӣ ва мебелбарорӣ дар Темурмалик ва ғайра ба истифода супурда шуданд.

Дар баробари ин, тадбирҳои андешида имкон доданд, ки соли сипаришуда аз 34 корхонаи саноатии аз фаъолият бозмонда 13-тои он фаъолияташро барқарор кард.

 

Нигина РАҲМОН, «Ҷумҳурият»