Дар Кохи фарҳанги шаҳри Ҳисор маросими  супурдани шаҳодатнома ва мукофот ба гирандагони Стипендияи Президенти Ҷумҳурии Тоҷикистон аз шаҳру ноҳияҳои тобеи ҷумҳурӣ - Ҳисор, Турсунзода, Ваҳдат, Файзобод, Варзоб, Рӯдакӣ ва Шаҳринав  баргузор гардид. Дар ҳамоиш  Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва намояндагони Мақомоти ҳокимияти давлатии шаҳри Ҳисор  иштирок ва суханронӣ намуданд.    

Дар ҳамоиш зикр гардид, ки наврасону ҷавонон ояндаи давлату миллат буда, дар меҳвари сиёсати Ҳукумати мамлакат, бахусус Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор доранд. Таваҷҷуҳу ғамхорӣ нисбат ба онҳо ҳанӯз аз солҳои аввали соҳибистиқлолӣ зоҳир гардида, пайваста густариш меёбад. 

Стипендияи Президенти Ҷумҳурии Тоҷикистон барои хонандагони болаёқат соли 1998 таъсис ёфта, маблағи он дар ибтидо 240 сомониро ташкил медод ва дар ҷумҳурӣ 300 нафарро дарбар мегирифт. Шумораи гирандагони стипендия дар соли хониши 2021 - 2022 ба 3000 нафар расида, маблағи он дар як моҳ 500 сомониро ташкил медиҳад. Дар шаҳри Ҳисор соли хониши 2021 - 2022 теъдоди гирандагони Стипендияи Президенти Ҷумҳурии Тоҷикистон аз 10 нафари қаблӣ ба 91 нафар расидааст, ки ин аз афзудани сафи хонандагони болаёқат ва донишманду закӣ шаҳодат медиҳад. 

Дар идомаи ҳамоиш гирандагони Стипендияи президентӣ бо шукргузорӣ аз соҳибистиқлолию озодии Ватани маҳбуб  миннатдории худро ба Пешвои муаззами миллат ҷиҳати фароҳам овардани шароити созгор барои омӯхтани илму дониш баён доштанд. Онҳо ваъда доданд, ки бо омӯхтани илмҳои пешрафта дар оянда ба давлату миллати худ хизмат хоҳанд кард.

Дар охир ҳунармандони бахши фарҳанги шаҳр дастагули шеъру таронаро дар васфи Ватану истиқлол ва зебоиҳои табиати диёр тақдими ширкаткунандагони ҳамоиш карданд. Меҳмонон, ҳамчунин, аз китобхона ва осорхонаи марказии шаҳр дидан намуда, як ҷаҳон таассурот бардоштанд.

 

Матлубаи АБДУҚАҲҲОР, «Ҷумҳурият»