Дар шаҳри Бохтар Ҷашни Сада бо шаҳомати хос таҷлил гардид. Нахуст, раиси вилояти Хатлон Қурбон Ҳакимзода аз намоишгоҳи маҳсулоти кишоварзӣ, саноати хӯрокворӣ, ҳунарҳои мардумӣ, ниҳолу гулбуттаҳо дидан намуд. Намояндагони шаҳру навоҳии вилоят беҳтарин намунаҳои маҳсулоти кишоварзӣ, корхонаҳои истеҳсолӣ, анвои таомҳои миллӣ, қаннодӣ, ниҳолҳои мевадиҳанда ва ороиширо ба маъраз гузоштанд. Сипас, дар толори Театри вилоятии мусиқӣ - мазҳакавии ба номи Ато Муҳаммадҷонов қисми тантанавии ҳамоиши идона идома ёфт.

 

Раиси вилояти Хатлон Қурбон Ҳакимзода аҳли толорро ба муносибати Иди ниёгон – Сада шодбош гуфт. Зикр гардид, ки дар фарҳанги суннатии ниёгонамон муборизаи равшанӣ бар  торикӣ ҳамчун ҷавҳари маънавӣ нақши калидӣ дорад, ки он ба Ҷашни Сада низ алоқаманд мебошад. 

– Аслан, дар идҳои Сада ва Меҳргон, ки ҷашнҳои кишоварзонанд, аз дастоварду муваффақиятҳои барзгарон ёдовар гардидан бамаврид аст, – гуфт раиси вилоят. – Дар иҷрои татбиқи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кишоварзони вилоят ҳаҷми умумии маҳсулоти кишоварзиро ба 20 миллиарду 694,5 миллион сомонӣ расонданд, ки афзоиши он нисбат ба нишондиҳандаи соли 2020-ум 1 миллиарду 191,6 миллион сомониро ташкил менамояд. 

Дар чорабинӣ беҳтарин пахтакор, занбӯриасалпарвар, чорводор, полизкор, кирмакпарвар, ҷангалбон, боғдор, парандапарвар, олимони соҳа ва дигар фаъолони комплекси агросаноатӣ бо ифтихорнома ва мукофотҳои Мақомоти иҷроияи ҳокимияти давлатии вилояти Хатлон сарфароз гаштанд.

Барои дастовардҳои шоён дар соҳаи кишоварзӣ дар соли 2021 ноҳияи Данғара бо «Шоҳҷоиза» ва 10 ҳазор сомонӣ мушарраф гардид. Соҳиби ҷойи дуюм - ноҳияи Кӯшониён бо вимпел ва 7000 сомонӣ қадр гашт. Ноҳияи Ҷайҳун, ки дар зинаи сеюм қарор гирифт бо вимпел ва 5000 сомонӣ мукофотонда шуд.

 

Зокир ҲАСАН, “Ҷумҳурият”