Робитаҳои анъанавии дӯстона ва муносибатҳои дуҷонибаи сиёсию иқтисодӣ, фарҳангию иҷтимоӣ бо Туркманистон, ки бо дастгирию роҳнамоиҳои сарварони Тоҷикистону Туркманистон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Президенти Туркманистон муҳтарам Гурбангули Бердимухамедов амалӣ гардид, ҳамкориҳои мутақобилан судманд густариш ёфта, таъмини заминаи асосӣ дар самтҳои гуногуни ҳамкориҳо рӯз ба рӯз тамоюли мусбӣ касб менамоянд.

Ин нуктаро Азим Иброҳим, вазири нақлиёт, дар ҷаласаи Маҷлиси намояндагони Маҷлиси Олӣ зимни баррасии Созишнома байни Ҳукумати Ҷумҳурии Тоҷикистон ва Ҳукумати Туркманистон «Дар бораи ҳамкорӣ дар соҳаи нақлиёти роҳи оҳан» иброз дошт. 

Созишнома бо мақсади рушди ҳамлу нақл ва транзити бор тавассути ҳудуди кишварҳо, таҳкими муносибатҳои дӯстонаю ҳамкориҳои дуҷониба, таъмини интиқоли мунтазам ва бехатари борҳо таҳия гардида, ба содагардонии раванди интиқол ва транзити борҳо, инчунин, кам кардани хароҷоти нақлиётӣ, ҳангоми интиқоли борҳо, мусоидат менамояд.

- Бо истифода аз роҳҳои оҳани транзитӣ ва бандари обии Туркманбошӣ тавассути баҳри Каспий баромадан ба роҳҳои оҳани кишварҳои Аврупо ва тариқи бандарҳои обии Ҷумҳурии Исломии Эрон, ба монанди Бандар Аббос ва дигар бандарҳои обии ин кишвар амалӣ намудани ҳамлу нақли мултимодалӣ (яъне, ҳамлу нақли бор бо якчанд намуди нақлиёт) бо кишварҳои мутараққӣ имконият пайдо мегардад. 

Азим Иброҳим афзуд, ки вобаста ба ташкили интиқоли мултимодалӣ байни Вазорати нақлиёти Ҷумҳурии Тоҷикистон ва мақомоти дахлдори Туркманистон масъалаи кушодани долони нақлиётии Туркманистон - Ӯзбекистон - Тоҷикистон - Чин ва баръакс мавриди коркард қарор гирифта, вохӯрии ҷонибҳо соли ҷорӣ ба нақша гирифта шудааст. Ташкили интиқоли мултимодалии борҳо тавассути нақлиёти роҳи оҳан аз Туркманистон то ба истгоҳи роҳи оҳани Кӯлоб ва сипас, тавассути нақлиёти автомобилӣ ба Чин пешбинӣ гардидааст.

Созишномаи мазкур бо мақсади таҳкими ҳамкории дуҷониба, рушди муносибатҳо дар соҳаи нақлиёт, мусоидат ба рушди иқтисодиёти ҳар ду кишвар, инчунин, ноил шудан ба яке аз ҳадафҳои стратегии Ҳукумати Ҷумҳурии Тоҷикистон, яъне ба кишвари транзитӣ табдил додани Тоҷикистон арзёбӣ мегардад.

 

Маҳмуд МИРЗОЁН, 

“Ҷумҳурият”