Дар Академияи идоракунии давлатии назди Президенти Ҷумҳурии Тоҷикистон магистратураи Мактаби давлатдории Эмомалӣ Раҳмон ифтитоҳ гардид.

 

Дар чорабинӣ ректори Академияи идоракунии давлатии назди Президенти Ҷумҳурии Тоҷикистон Абдухалил Ғафурзода, мушовири бахши ёрдамчии Президенти Ҷумҳурии Тоҷикистон оид ба масъалаҳои кадрҳо Олимшо Меҳрӣ, вазири меҳнат, муҳоҷират ва шуғли аҳолии Ҷумҳурии Тоҷикистон Ширин Амонзода,  раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода ва устодону кормандони академия иштирок намуданд.

Ректори академия Абдухалил Ғафурзода гуфт, ки бо мақсади беҳтар намудани сатҳу сифати таълиму тарбия, пурқувват кардани иқтидори ҳайати кадрии хизматчиёни давлатӣ ва таҳқиқу омӯзиш Академияи идоракунии давлатии назди Президенти Ҷумҳурии Тоҷикистон дар асоси розигӣ ва дастгирии Президенти Ҷумҳурии Тоҷикистон муҳтарам Эмомалӣ Раҳмон дар заминаи академия магистратураи Мактаби давлатдории Эмомалӣ Раҳмонро таъсис дод. Мушовири бахши ёрдамчии Президенти Ҷумҳурии Тоҷикистон оид ба масъалаҳои кадрҳо Олимшо Меҳрӣ зикр намуд, ки Пешвои миллат муҳтарам Эмомалӣ Раҳмон замоне роҳбари давлати тоҷикон гардид, ки Тоҷикистон ба вартаи ҷанги шаҳрвандӣ гирифтор буд ва тамоми шохаҳои мақомоти давлатӣ фалаҷ гардида, аз уҳдаи идоракунии мамлакат намебаромаданд. Дар чунин шароити сангин вазифаи муҳимтарини роҳбарияти нави Тоҷикистони соҳибистиқлол пешгирии шикасти минбаъдаи пояҳои давлатдорӣ, ба роҳ мондани фаъолияти мақомоти давлатӣ ва таъмини амнияти давлат ба ҳисоб мерафт. Муҳтарам Эмомалӣ Раҳмон бо дарки воқеии вазъияти сиёсӣ, иқтисодию иҷтимоии мамлакат аз лаҳзаҳои нахустини фаъолият дар ин мақоми барои сарнавишти миллат ва давлат басо пурмасъулият барномаи мукаммали аз буҳрони сиёсӣ, иқтисодӣ, фарҳангӣ ва маънавӣ раҳо бахшидани кишварро ба миён гузошт. Мактаби давлатдории Пешвои миллат арзандаи омӯзиш буда, зарур аст, ки хизматчиёни давлатӣ таҷрибаи бузурги давлатдории муҳтарам Эмомалӣ Раҳмонро омӯзанд.

Дар соли 2022 ба шуъбаи магистратураи Мактаби давлатдории Эмомалӣ Раҳмон 46 магистрант аз рӯйи ихтисосҳои  идораи давлатӣ,  сиёсати хориҷӣ ва дипломатия шомил шуд. 

Хуршед МАВЛОНОВ