Дар шаҳри Тошканд мулоқоти роҳбарияти Кумитаи рушди саноати абрешим ва пашми Ҷумҳурии Ӯзбекистон бо намояндагони Ҷамъияти саҳомии кушодаи “Пиллаи тоҷик” баргузор гардид. Дар ҷараёни суҳбат ҷонибҳо оид ба вусъат бахшидани ҳамкориҳо, комёбиҳои саноати абрешим дар солҳои охир, ислоҳоти иқтисодӣ, сармоягузории хориҷӣ, васеъ намудани базаи хӯрока, махсусан тутзор ва роҳҳои истифодаи самараноки он табодули назар карданд.  

Тибқи иттилои дафтари матбуоти Кумитаи рушди саноати абрешим ва пашми Ӯзбекистон, ин мулоқот дар ҳоле сурат гирифт, ки намояндагони ҶСК “Пиллаи тоҷик” қаблан ба вилоятҳои Фарғона ва Сурхондарёи Ӯзбекистон ташриф оварда, бо фаъолияти кирмакпарварон аз наздик шинос шудаанд. Дар ҷараёни ин сафар мизбонон ба меҳмонон 11 навъи тутзорро нишон додаанд, ки бо истифода аз онҳо кирмакпарварон ба истеҳсоли пилла машғуланд. Инчунин, меҳмонон намоишгоҳи иттиҳодияи «Ӯзбекпаксаноат»-ро низ тамошо кардаанд, ки маҳсулоти аз абрешим тайёршударо ба намоиш гузошта буданд.

- Маҳз натиҷаи имтиёзҳост, ки мо соли равон пиллаи хушсифат рӯёндем. Ҳоло дар ҷумҳурии мо соле зиёда аз 25 ҳазор тонна пилла истеҳсол мешавад. 76 корхона бевосита ба коркарди пилла машғул мебошанд, - изҳор дошт Баҳром Шарипов, раиси Кумитаи рушди саноати абрешим ва пашми Ӯзбекистон зимни мулоқот.

Ба таъкиди ӯ, панҷ фабрикаи истеҳсоли матоъ мавҷуд аст ва тавассути он ҳудуди 50 дарсади абрешим ба матоъ табдил шуда, ба хориҷа содир мегардад: “Дар ин соҳа қариб як миллион нафар кор мекунанд, ки 90 дарсади онҳоро бонувон ташкил медиҳанд. Пешбинӣ мешавад, ки соли ҷорӣ онҳо тадриҷан аз кирмакпарварӣ ба истеҳсоли матоъ ва маҳсулоти тайёр гузаранд”

Дар идомаи суҳбат Назиршо Назаров, роҳбари ҶСК “Пиллаи тоҷик”, аз таҷриба ва иқтидори Ҷумҳурии Ӯзбекистон дар соҳаи истеҳсоли абрешим тавсиф намуда, чунин изҳор доштааст: “Мо соле як маротиба ҳосили пилла ба даст меорем. Ҳоло бо истифода аз таҷрибаи ҳамтоёни ӯзбеки худ истеҳсоли пилларо 2 – 3 баробар афзоиш хоҳем дод. Барои ин мо базаи хӯроки кирмакро мустаҳкам мекунем. 50 ҳазор бех ниҳоли тутро аз кишварҳои хориҷӣ дастрас кардем, ки бо парвариши он ба рушди саноати кирмакпарварӣ дар кишварамон ноил хоҳем шуд”. 

Зимнан, Н. Назаров ба рушди ҳамкориҳои дуҷониба бо истифода иқтидорҳои мавҷуда таъкид намудааст.

Бино ба иттилои манбаъ, дар ин нишаст байни ҶСК “Пиллаи тоҷик ва Кумитаи рушди саноати абрешим ва пашми Ӯзбекистон Ёддошти тафоҳум имзо шудааст, ки барои ифтитоҳи корхонаҳои муштарак заминаи мусоид мегузорад.

Сафари роҳбарият ва намоядагони ҶСК “Пиллаи тоҷик” дар Ҷумҳурии Ӯзбекистон идома дошта, қарор аст, дар чорабиниҳои ҷумҳуриявии «Соли сабз», ки ташкилотҳои коркарди пиллаи соири вилоятҳои Ӯзбекистон баргузор мекунанд, иштирок намоянд.

 

Мирасрор АҲРОРОВ, шаҳри Тошканд