Ҳафтаи равон бо дастгирии Ташкилоти ҷамъиятии “Авесто”, Созмони ҷаҳонии тандурустӣ, Вазорати тандурустӣ ва ҳифзи иҷтимоии  аҳолии Ҷумҳурии Тоҷикистон  ва  раёсати тандурустӣ  барои табибони оилавӣ  семинар ва омӯзишҳо  гузаронда шуданд. Имрӯз проблемаи муқовимат ба зидди микробҳо глобалӣ мегардад. Пайдоиши муқовимати зиддимикробӣ дар саросари ҷаҳон ва дар доираи васеи микроорганизмҳо мушоҳида гардидааст. 

Паҳншавии ин падида афзуда, ба саломатии ҳам одамон ва ҳам ҳайвонот таҳдид мекунад. Оқибатҳои фаврии сироят бо организмҳои тобовар метавонанд ҷиддӣ бошанд, аз ҷумла давомнокии тулонии беморӣ, афзоиши фавт, дар беморхона бистарӣ будан, муҳофизати сусти беморон аз сироят ҳангоми ҷарроҳӣ ва дигар расмиёти тиббӣ ва афзоиши хароҷоти табобат.

Тоҷикистон дар байни 12 мамлакати ғайриаврупоӣ ҷойи сеюмро оид ба устувории антибиотикҳо ишғол менамояд.

Дар 29 кишвари минтақаи Аврупо ҳар сол тақрибан 25 000 нафар аз сироятҳои муқовимат ба антибиотикҳо мефавтанд, ки аксари онҳо дар беморхонаҳо рух медиҳанд. Ин боиси хароҷоти назарраси саломатӣ дар натиҷаи бистарӣ дар беморхона дарозтар ва хароҷоти баланди табобат бо хароҷоти мустақим ва ғайримустақим ба ҷомеа мегардад.

Муқовимати зиддимикробӣ маънои онро дорад, ки бактерияҳо ба мавҷудияти антибиотикҳо мутобиқ мешаванд ва афзоишро идома медиҳанд. 

Дар Тоҷикистон доруҳои зиддимикробӣ бештар аст. Гузашта аз ин, дар бисёр мавридҳо ин доруҳо оқилона таъин карда намешаванд. Дар табобати беморони гирифтори патологияи сироятӣ сатҳи хеле пасти истифодаи санҷишҳои ҳассосият вуҷуд дорад. Дастрасии густурдаи аҳолӣ ба доруҳои зиддимикробӣ, таҷрибаи бе дорухат аз дорухонаҳо додани онҳо низ ба паҳншавии муқовимати зиддимикробӣ мусоидат мекунад. Илова бар ин, дар аксар мавридҳо  аҳолӣ ба худтабобаткунӣ машғул мешаванд. 

 Инчунин, дар интернет маълумот дар бораи табобат кардани худ бо антибиотикҳо метавон пайдо кард.

Дар Тоҷикистон антибиотикҳоро на танҳо барои табобати одамон, инчунин, дар тибби байторӣ, махсусан дар чорводорӣ, гӯшту шир ва саноати хӯрокворӣ, ҳам барои табобати бемориҳои ҳайвонот ва ҳам барои ҳавасмандгардонии афзоиш васеъ истифода мешаванд.

Тавсияҳо ба аҳолӣ оид ба истифодаи антибиотикҳо.

Устуворӣ ба доруҳои зиддимикробӣ хатари ҷиддии глобалӣ маҳсуб мешавад ва агар ин хатар пешгирӣ нагардад, пас, сироятҳои одӣ аз нав ба ҳаёти ҳаррӯза хавф меоранд.

 Ташкилоти  ҷаҳонии тандурустӣ огаҳ менамояд:

1. Доруҳои зиддимикробиро танҳо бо тавсияи табибон бояд қабул намуд.

2. Беасос қабул намудани антибиотикҳо ба устувории бактерияҳо мерасонад.

3. Антибиотикҳо барои табобати бемориҳои вирусӣ бесамар мебошанд.

4. Танҳо он доруҳои зиддимикробиро қабул бояд намоед, ки табибон тавсия медиҳанд.

5. Меъёри доруҳои зиддимикробиро низ мувофиқи тавсияи табибон бояд қабул намуд.

6. Ваксинатсия шуморо аз устувории зиддимикробӣ муҳофизат менамояд.

 

Комилҷон КАБИРОВ,

табиби оилавии Маркази саломатии

шаҳрии № 1-уми шаҳри Душанбе