- Дар рушди зеҳнӣ ва дастболо гардидани ҳар нафар дар зиндагӣ, ҳатман як сарчашмае мавҷуд аст ва ман ҳам калиди муваффақиятҳои худро дар ҳамкорӣ бо рӯзномаи “Ҷумҳурият” дарёфтам. Рӯзномаро пайваста мутолиа мекунам ва аз ҳар сатри матолиби он барои худ ғизои маънавӣ мегирам. Аз шумули матлабҳои умумии рӯзнома барои ман маводи саҳифаи “Шоми шанбе” бисёр ҷолибу шавқовар аст. Навиштаҳои кӯтоҳу хондание, ки ба кас ҳам фароғат мебахшанд ва ҳам донишу ҷаҳонбинӣ. Ба ростӣ, маҳз барои ҳамин саҳифа нашри шумораҳои навбатиро интизорӣ мекашам. Вале танҳо ман набудам, ки ин саҳифа таваҷҷуҳамро ба худ кашид, балки устодону ҳамсабақонам низ, ба он мароқи зиёд зоҳир мекарданд. Ҳар ҳафта шумораи рӯзи ҷумъа, ки дар он саҳифаи “Шоми шанбе” нашр мешавад, баробари ба дасти мо расидан, даст ба дасти ҳамсабақону омӯзгорон мегардад.

Ин матлабро Умедҷон Амонӣ, донишҷӯйи Донишкадаи давлатии фарҳанг ва санъати Тоҷикистон ба номи Мирзо Турсунзода, зимни як суҳбати видеоӣ ба мо иброз дошт, ки он барои корбарони шабакаҳои иҷтимоӣ тавассути Ютубканали рӯзномаи “Ҷумҳурият” қобили дастрасист. Ӯ дар идома иброз дошт: “Рӯзе дидам, ки дар як шумора барои рубрикаи “Интеллект”-и саҳифаи “Шоми шанбе” озмун барои тайёр намудани муаммо, чайнворду филвордҳо эълон гардидааст. Ман, ки рағбати беандоза ба корҳои зеҳнӣ доштам, ин эълон орзуи ҳамкорӣ бо “Ҷумҳурият”-ро дар дилам шуълавар кард. Дарҳол, аз ин фурсат истифода карда, муаммоҳоямро ба унвонии рӯзнома пешниҳод намудам ва он даричае барои ҳамкорӣ гардид. Дар рафти ҳамкорӣ, муҳити солим ва муносибати хуби кормандони ин нашрия маро руҳбаланд ва ба идомаи ҳамкориҳо водорам менамуд. Бо ҳамин завқи маънавии ман боло мерафт ва муаммоҳоям дар саҳифаи “Шоми шанбе” ҳаводорони худро пайдо мекарду чанд маротиба маро ғолиб дониста, бо туҳфаҳои хотиравию маблағҳои пулӣ сарфароз намуданд”. 

Ҳамсуҳбати мо, барандаи ҷоизаи махсуси Озмуни ҷумҳуриявии “Фурӯғи субҳи доноӣ китоб аст”, ба даст овардани ҷоизаи фестивали ҷумҳуриявии “Хуҷаста бод истиқлол”, озмуни “Вақте қалам мегирам”-ро самараи ҳамкориҳояш бо рӯзномаи “Ҷумҳурият” хонда, изҳор дошт, ки ин нашрияи бонуфуз дар бедории фикрӣ, эҳсоси гарми ватандӯстии ӯ нақши мунир гузоштааст. 

– Аз ҳамкорӣ бо “Ҷумҳурият” ба ман саодате даст дод, ки ҷоизаи Иттифоқи журналистони Тоҷикистонро дар самти матбуот соҳиб гардам, ба гирифтани Стипендияи президентӣ мушарраф шавам ва ниҳоят барои идомаи таҳсил ба Ҷумҳурии Федеративии Олмон роҳхат гирам. Ин ҳама музаффариятҳои ман ва дигар ҷавонон дар партави дастгириҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аст, ки ба мо ғамхориҳои зиёд зоҳир намуда, барои таҳсил дар дохилу хориҷи мамлакат тамоми шароитҳоро фароҳам карданд. Мо низ дар ҷавоб ба ин ғамхориҳо пайваста мекӯшем, то мутахассисони касбӣ гардида, барои пешрафти ватанамон саҳми арзанда гузорем, - иброз дошт Умедҷон Амонӣ.

 

Судобаи ФАЙЗАЛӢ,

 “Ҷумҳурият”