Дар асоси дастури  Кумитаи иҷроияи ҲХДТ дар шаҳри Душанбе ва нақша – чорабиниҳои Кумитаи иҷроияи ҲХДТ дар ноҳияи Сино, ҷиҳати шарҳу тавзеҳи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ гурӯҳи корӣ бо сокинони маҳаллаи Ҳамадонӣ, минтақаи 112 ва кормандони ҷамъиятҳои “Шабакаҳои интиқоли барқ” ва “Шабакаҳои тақсимоти барқ” доир ба одоби шаҳрнишинӣ, густариши корҳои ободонӣ ва пешгирии бемории сироятии COVID – 19 вохӯрӣ баргузор намуд. 

 

Зимни вохӯрӣ масъулону кормандони КИ ҲХДТ дар  ноҳия, Мақомоти иҷроияи ҳокимияти давлатии ноҳияи Сино ва як қатор роҳбарони корхонаю ташкилотҳо доир ба нуктаҳои асосии Паём, аз ҷумла дастгирии занону ҷавонон, тақвияти корҳои ободонию тозагӣ, таблиғу ташвиқи афкори ватандӯстона сухан ронданд. Аз ҷумла, Заррина Файзуллозода, раиси Кумитаи иҷроияи ҲХДТ дар ноҳияи Сино, А. Каримова, муовини раиси ноҳия, аз сокинон даъват ба амал оварданд, ки дар робита ба иҷрои нуктаҳои Паёми навбатии Президенти мамлакат ба Маҷлиси Олӣ, риояи фарҳанги шаҳрнишинӣ дар ҳамкорӣ бо сохторҳои давлатӣ бештар аз пештара саъю талош варзанд. 

Зикр гардид, ки тарғиби ғояҳои созандагию меҳанпарварӣ дар байни ҷавонон яке аз нуктаҳои муҳимтарини Паём буда, нафарони собиқадор дар роҳи амалисозии он бояд фаъол бошанд. 

Ба иттилои Ҳангома Давлатзода, мудири шуъбаи умумии Кумитаи иҷроияи ҲХДТ дар шаҳри Душанбе, имрӯзҳо сафи аъзои ҷавони ҲХДТ рӯ ба зиёдшавӣ дошта, аз боло рафтани огоҳии онҳо аз сиёсати пешгирифтаи Ҳукумати кишвар дарак медиҳад.   

- Баробари корҳои дигари бунёдкорӣ, сокинони шаҳрро зарур аст, ки аз худ ба дигарон рафтору гуфтори намунавӣ нишон дода, ба ҳусни зебоафзуни шаҳр доғ наоранд ва дар риояи фарҳанги шаҳрнишинӣ хунукназарӣ накунанд. Солҳои охир дар натиҷаи заҳмату ибтикороти раиси шаҳр Душанбе ҳамчун маркази маъмурии мамлакат ва оинаи миллати соҳибтамаддуни тоҷик ба меъёрҳои ҷаҳонӣ мутобиқ гардидааст. Ободониҳои бемислу пуршаҳомат ҷараён доранд. Чорабиниҳои фарҳангию илмӣ авҷи тоза гирифта, пойтахти Тоҷикистон ба асолати тамаддунмеҳварии худ устувор қадам мегузорад, - изҳор намуд Ҳангома Давлатова. 

Тавре аз КМИ ҲХДТ иттилоъ доданд, чунин силсилавохӯриҳо дар партави дастуру супоришҳои Пешвои муаззами миллат дар робита ба ҷашну чорабиниҳои миллӣ, омодагӣ ба 35-умин солгарди Истиқлоли давлатӣ, гиромидошти фарҳангу худшиносӣ, ҷилавгирӣ аз гаравидани ҷавонони ноогоҳ ба ҳаракатҳои иртиҷоӣ пайваста ба роҳ монда шудааст. 

 

Ташрифулло САЪДУЛЛОЕВ, 

«Ҷумҳурият»