ТАСС. Владимир Путин,  Президенти Россия, нахустин дидори имсолаи худро бо ҳамтои белорусиаш Александр Лукашенко баргузор мекунад. Гуфтушуниди сарварони давлатҳо имрӯз дар Кремл барпо мегардад.

Барои Путин ин гуфтугӯ идомаи як силсила тамосҳои рӯбарӯи байналмилалӣ хоҳад буд. Ҳамин тавр, танҳо дар ин ҳафта, ӯ  дар Кремл бо Канслери Олмон Олаф Шолс ва Президенти Бразилия Жаир Болсонару мулоқот намуд. Пеш аз ин, раҳбарони Аргентина, Маҷористон, Қазоқистон ва Фаронса аз Россия дидан карданд.

Дар миёни мавзуъҳои мубрам, ки ахиран дар музокирот садо медиҳад, амният дар Аврупо ва авзоъ дар атрофи Украина мебошад. Дар баробари ин, аз ҷумла масъалаҳои дигари марбут ба ҳамкориҳои гуногунҷанбаи дуҷониба низ, мавриди баррасӣ қарор мегиранд.  

 

СММ таҳдидҳои асосӣ ба  инсониятро  номбар кард

Lenta.ru. Коршиносони Барномаи Соз-мони Милали Муттаҳид оид ба  муҳити зист (UNEP)  сӯхторҳои харобиовари ҷангал, овозҳо ва дуди воситаи нақлиёт, заводу фабрикаҳо ва амсоли инҳоро яке аз таҳдидҳои аслии башарият унвон кардаанд. Ба гуфтаи коршиносон, ин зуҳурот ба табиат ва саломатии инсон таъсири манфии чашмрас доранд. Матни гузориш дар  сомонаи созмон нашр шудааст.

Тибқи ин санад, аз соли 2002 то соли 2016 ҳамасола дар ҷаҳон ба ҳисоби миёна 423 миллион гектар ҷангал сӯхтааст. Ба гуфтаи коршиносон, тақрибан 67 дарсади сӯхтор, аз ҷумла сӯхтори дарахтон, дар кишварҳои Африқо рух медиҳад. Бо вуҷуди ин, UNEP пешгӯӣ мекунад, ки офатҳои табиии хатарнок бо гузашти солҳо бештар мешаванд, аз ҷумла дар он қисматҳои ҷаҳон, ки барои онҳо хос нестанд.

“Ин ба тағирёбии иқлим, аз ҷумла болоравии ҳарорати ҳаво ва хушксолиҳои зуд-зуд, вобаста аст. Омили дигари хатар ин тағйирёбии истифодаи замин, аз ҷумла қасдан буридани ҷангалҳо барои  парвариши зироатҳо ва чорводорӣ ё бозсозии  шаҳрҳо, мебошад", - гуфта мешавад дар гузориш.

 

Токаев: «Қазоқистон бояд аз инҳисорот дар иқтисод ва сиёсат комилан халос шавад»

Мир24. Президенти  Қазоқистон  Қосим-Жомарт Токаев дар мусоҳиба бо шабакаи телевизиони давлатии «Qazaqstan» иброз дошт, ки кишвар бояд аз инҳисорот (монополияҳо) дар иқтисод ва сиёсат комилан халос шавад.

Албатта, ин кори осон нест, аммо мо бояд, бешубҳа, ба он бирасем. Илоҷи дигар надорем, - таъкид кард Сарвари давлат.

Токаев ёдовар шуд, ки дар кишвар ҳукмронии доираи танги одамон дар соҳаи иқтисодӣ ба назар мерасад. «Дар мо чунин тамоюл торафт вусъат меёбад. Инро бисёриҳо, махсусан соҳибкорон,  хуб медонанд. Ин ба рақобати воқеӣ халал мерасонад ва васеътар гӯем, хилофи адолат аст», - шарҳ дод Президент.  

Токаев волоияти қонунро барои ҷомеа муҳимтарин масъала номид. “Мутаассифона, шаҳрвандони зиёде ҳастанд, ки намехоҳанд қонунҳоро риоя кунанд”, - гуфт ӯ.   

 

Сафири Россия: «Ҳама номзадҳо ба мақоми  Президенти  Фаронса ҷонибдори рушди равобит бо Маскав ҳастанд»

ТАСС. Дар Фаронса вазъияте ба вуҷуд омадааст, ки барои Аврупои Ғарбӣ ғайриодӣ мебошад, зеро ҳамаи номзадҳои асосии президентӣ дар ин кишвар ҷонибдори рушди муносибатҳо бо Россия мебошанд. Дар ин бора  сафири Россия дар Фаронса Алексей Мешков дар пахши шабакаи телевизионии «Россия – 24» хабар дод.

Мешков таъкид кард, ки ин "ангезаи иловагӣ" медиҳад, то дар ин давраи пешазинтихоботӣ  рушди равобити дуҷониба қатъ нагардад. Ба саволи возеҳи баранда дар бораи он, ки оё баъзе аз ин номзадҳо ҷонибдори чунин ҳамкориҳо танҳо барои худнамоист, сафир инро рад карда, изҳор дошт, ки онҳо ба ҷонибдории қатъи «таблиғоти беасос зидди Россия дар Иттиҳоди Аврупо» ҳатто пеш аз он, ки номзад шаванд, сухан гуфта буданд.

"Президенти Фаронса Эммануэл  Макрон тули давраи президентии худ аз рушди муносибатҳои дуҷониба фаъолона пуштибонӣ кард", - ёдовар шуд сафир.