Таҷрибаи ҷаҳони муосир равшан сохт, ки бо вуҷуди шароиту имкониятҳои бемаҳдуд боз зуҳуроте ҳам метавонанд, ҳаёти инсониятро ба ларза оваранд ва то андозае монеи рушди бомароми зиндагӣ дар рӯйи олам гарданд. Намунаи маълуми ин гуфтаҳо бемории нави  COVID-19 мебошад, ки охири соли 2019 дар минтақаи Вуҳани Ҷумҳурии Мардумии Чин пайдо шуд ва дар давоми се-чор моҳ тамоми дунёро фаро гирифт. Одамони бо ҳаёти орому осуда одаткарда аз зуҳури ин беморӣ ва пайомадҳои маргбори он якбора ба даҳшат афтоданд ва қариб тамоми аҳли ҷаҳон гӯшанишин шуд. Вақт аён кард, ки ҷаҳон ба таъбири устод Рӯдакӣ, “ҳамеша гирдгардон аст” ва имкон дорад, ки балоеву вабое аз куҷое пайдо шавад ва фарзандони Одамро ба зону нишонад.

 

Хушбахтона, ақли солим ва неруи илмии башарӣ дар асоси ҳамдиливу ҳамдигарфаҳмӣ, дӯстиву тифоқӣ ва шинохти дурусти хавфу хатарҳои дар пасманзари ин беморӣ нуҳуфта заминасози муборизаҳо гардид. 

Дар кишвари мо бо тадбирҷӯйиҳои судманди Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҳамовозиву ҳамраъйии сокинони шарафманди мамлакат чораҳои фаврии бехатариву беҳдоштӣ рӯйи кор оварда шуд. Ҳама бо масъулияти баланд хатарҳои коронавирусро дарк намуда, талаботи муқаррарнамудаи Созмони ҷаҳонии тандурустӣ ва Ситоди ҷумҳуриявӣ оид ба пурзӯр намудани чораҳои зиддиэпидемӣ барои пешгирии интиқолу паҳншавии бемории сироятии  COVID-19-ро сари вақт иҷро намуданд.  Дар пешгоҳи арсаи мубориза ва ҷабҳаи талошу пайкор табибон ва кормандони соҳаи тандурустӣ қарор гирифтанд. Онҳо ҷони хешро ба гарав гузошта, ба савганди худ садоқат нишон дода, барои иҷрои дастуру ҳидоятҳои Пешвои муаззами миллат ва халқ камари ҳиммат бастанд.

Бахусус, ин чорабинӣ ва маъракаи муҳим дар пойтахти мамлакат бо дастури раиси шаҳри Душанбе Рустами Эмомалӣ дар сатҳи баланди касбиву омодагӣ ташкил шуд. Дар радифи кулли пизишкони мамлакат ҷомеаи тифоқу таҷрибаандӯхтаи Муассисаи давлатии шаҳрии “Маркази саломатии № 14”-и пойтахти мамлакат бо мақсади иҷрои фармоишҳои Вазорати тандурустӣ ва ҳифзи иҷтимоии аҳолии ҷумҳурӣ ва Раёсати тандурустии шаҳр баробари таъсиси бахши алоҳидаи эмгузаронӣ дар худи марказ, инчунин, 31 бригадаи сайёри ваксинагузаронӣ созмон дода, ҳамарӯза дар маҳаллаҳо, коргоҳу корхонаҳо, мактабу кӯдакистонҳо, масҷидҳо ва дигар коргоҳу муассисаҳо барои эмгузаронӣ тадбирҳои амалӣ меандешанд. Пизишкон ба аҳолӣ зарурати қабули ваксинаро фаҳмонда, таъкид месозанд, ки мардум ба хурофот дода нашуда, бояд аз ваксинаи ройгон истифода баранд ва саломатии худро, ки гавҳари бебаҳост, ҳифз намоянд.

Бояд зикр намуд, ки халқи тоҷик аз айёми қадим миллати соҳибтамаддуну соҳибфазилат аст. Ин миллати номдор ба ҷаҳониён алломагони илму дониш, амсоли Абунасри Форобӣ, Абуалӣ ибни Сино, Закариёи Розӣ, Абурайҳони Берунӣ, Фахруддини Розӣ, Насириддини Тӯсӣ, Муҳаммади Хоразмӣ, Абулқосим Маҳмуд ибни Умари Замахшарӣ, Умари Хайём ва ҳазорон ҳазор нобиғагонро ҳадя намудааст. Олимону муҳаққиқон ҳамеша ба ҳақиқату воқеият такя намудаанд, аз таҷрибаҳо истифода бурдаанд ва ҳосили андӯхтаҳои худро ба имрӯзиёну фардоиён ба мерос гузоштаанд. Дар таърихи илм усул ва шеваҳои дурусту санҷидашудаи Абуалӣ ибни Сино барои пешгирии бемории вабои дар Хоразми қадим рухдода боиси ёдоварист. Ин ҳакими фарзона таъсири амалии даво, парҳезу беҳдошт, покиву назофат ва худшиносиро омили раҳоӣ аз кулли офату бемориҳо дониста буд. Дар осори ӯ ва китобҳои олимони дигари соҳаи тиб ягон вақт амалҳои хурофотӣ ва боварҳои ғайритасаввуротӣ омили таъсиргузору манфиатбахш ба шумор нарафтаанд.

Аз ин лиҳоз, дар ҳазорсолаи сеюм рӯ овардан ба ҳама гуна фаҳмишҳову таълимоти хурофотӣ ҳалокатбор аст. Бояд ҳар як сокини мамлакат ба қадри ғамхориҳои давлату Ҳукумат ҷиҳати пешгирии беморӣ бирасад. Ваксина омили ягонаи муҳофизати инсон ва таҳкими масунияти ӯ ба ҳисоб меравад. 

Ба андешаи мо, дар баробари пизишкону кормандони соҳаи тандурустӣ, бояд олимону муҳаққиқон, омӯзгорону рӯзноманигорон, шоирону нависандагон, эҷодкорон ва фаъолони ҷомеа дар тарғибу ташвиқи суду фоидаи ваксина ёрии амалӣ расонанд. Мо бояд ҳарчи бештар маъракаи эмгузарониро тезонда, барои ташкили масунияти умумихалқӣ нақши муассир гузорем.

 

Барот МИРСАИДОВ,

пизишки Муассисаи давлатии шаҳрии 

“Маркази саломатии № 14”-и шаҳри Душанбе