Дар Китобхонаи миллии Тоҷикистон ҷаласаи расмии Шурои ҳамоҳангсозии байнисоҳавии татбиқи «Стратегияи ҳифзи солимии аҳолии Ҷумҳурии Тоҷикистон барои давраи то соли 2030» баргузор гардид. Дар он дастовардҳои умумӣ ва мушкилоти татбиқи стратегияи мазкур ва саҳми шарикон оид ба рушд мавриди баррасӣ ва таҳлил қарор гирифт. Ҳамчунин, дар ҳамоиш мавод ва таҷҳизоти тиббии истеҳсоли корхонаҳои ватанӣ ба намоиш гузошта шуданд.

Вазири тандурустӣ ва ҳифзи иҷтимоии аҳолии ҷумҳурӣ Ҷамолиддин Абдуллозода иброз дошт, ки дар стратегияи мазкур омадааст: “Таъмини дастрасӣ ба хизматрасониҳои тандурустӣ бояд тавассути рушди кумаки аввалияи тиббию санитарӣ бо тибби оилавӣ асоснок шуда, ҳифзи солимии модару кӯдак ва хизматрасонӣ оид ба солимии ҷинсӣ, репродуктивӣ ва ҳуқуқи наврасон, фаъолият дар самти бемориҳои сироятӣ, аз ҷумла пешгирӣ, нигоҳубин ва табобат, пешгирӣ ва табобати бемориҳои ғайрисироятӣ, ҳамзамон, таъмини хизматрасониҳои асосии тандурустии ҷамъиятӣ, баланд бардоштани масъулияти аҳолӣ барои саломатии худ ва дигарон тавассути тарғиби тарзи ҳаёти солим, татбиқи механизми таъмини бехатарӣ ва қобили қабул будани таъминоти оби нӯшокӣ, фаъолияти пурраи соҳаи тандурустӣ ва низоми озмоишгоҳӣ амалӣ карда шавад”.

Ҳамчунин, дар ҳамоиш сардори раёсати рушди иҷтимоии Дастгоҳи иҷроияи Президенти Ҷумҳурии Тоҷикистон Гулҷаҳон Абдулфаттоҳзода, муовини раиси кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои иҷтимоӣ, оила ва ҳифзи саломатӣ Гулбаҳор Ашурзода, роҳбари Шурои ҳамоҳангсозии шарикони рушд, ҳамоҳангсози рушди СММ дар Тоҷикистон Сизен Синаноглу, намояндаи Иттиҳоди Аврупо Марк Бухман ва намояндагони сохторҳои дахлдори мамлакат иштирок ва маъруза намуданд.

Зикр гардид, ки Вазорати тандурустӣ ва ҳифзи иҷтимоии аҳолӣ соли 2021 дар доираи дастуру супоришҳои Пешвои миллат муҳтарам Эмомалӣ Раҳмон дар самти рушди хизматрасонии тиббӣ ва ташаккул додани соҳаи фарматсевтии мамлакат бо назардошти дастовардҳои илми муосир ва технологияи ҳозиразамон, ба роҳ мондани усулҳои нави пешгирӣ, ташхис ва табобат бо мақсади иҷрои супоришҳои афзалиятноки Ҳукумати Ҷумҳурии Тоҷикистон вобаста ба таҳлил ва бартараф намудани камбудиҳои ҷойдошта корҳои муайянро ба анҷом расонд.

Гуфта шуд, ки дар самти пешгирии бемориҳои сироятиву ғайрисироятӣ, дастгирии муассисаҳои соҳаи тандурустию ҳифзи иҷтимоӣ тавассути корҳои сохтмонию барқарорсозӣ, муҷаҳҳазгардонӣ бо таҷҳизоти ҳозиразамон, пурзӯр намудани неруи кадрӣ, баланд бардоштани сатҳи маърифатнокию иттилоотонии аҳолӣ ва кормандони тиббӣ заминаи мусоид фароҳам омад.

Дар ҷамъбасти ҷаласа бо иштироки намояндагони Вазорати тандурустӣ ва ҳифзи иҷтимоии аҳолӣ, намояндагони СҶТ ва хабарнигорон нишасти матбуотӣ доир гардид, ки намояндагони ВАО ба саволҳои худ доир ба «Стратегияи ҳифзи солимии аҳолии Ҷумҳурии Тоҷикистон барои давраи то соли 2030» ва дигар масъалаҳои вобаста ба он посухҳои мушаххас гирифтанд.

 

Зикруллоҳ РАҶАБЗОДА, 

“Ҷумҳурият”