Бонувони тоҷик дар рушди илм нақши мондагор доранд. Бо пажӯҳишҳои фароху доманадоре, ки то имрӯз дар самтҳои гуногун анҷом додаанд, садҳо суоли беҷавобро посух дарёфтаву бо ихтирооташон бисёр муаммои иқтисодиву иҷтимоиро ҳаллу фасл намудаанд. Ин нукта зимни ҳамоиши “Саҳми занон дар рушди илм”, ки дар доираи  Рӯзи байналмилалии занон ва духтарон  доир гардид, зикр шуд.

 

Ҳамоиш, ки  бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон ва Академияи миллии илмҳои кишвар баргузор гардид, бонувон – олимони кишварро ба ҳам овард.

Ҳилолбӣ Қурбонзода, раиси кумита бо зикри он, ки нақши бонувони кишвар дар пешрафти илм созгор мебошад, ба ҳамоиш оғоз бахшид. “Тоҷикистон чун давлати демокративу ҳуқуқбунёд барои донишандӯзии бонувон таваҷҷуҳи хосса зоҳир намуда, ҷиҳати ба илм пайвастани онҳо шароити зарурӣ фароҳам меорад. Натиҷаи ҳамин дастгириҳост, ки шумораи занон дар роҳи илм сол ба сол зиёд мегардад. Агар соли 1991 дар муассисаҳои таҳсилоти олии кишвар 1 835 номзади илм ва 226 доктори илм дарс мегуфтанд, ҳоло ин нишондод ба  2 505 номзади илм ва 650 доктор расидааст. Дар Академияи миллии илмҳои кишвар бошад, 2 академик, 3 узви вобастаи Академияи миллии илмҳо, 25 доктори илм, 96 номзади илм, 72 докторанти PHD бо пажӯҳишҳои доманадорашон дар рушди илм саҳми созгор мегузоранд.

Бонувони тоҷикро бо пажӯҳиши пурмуҳтаво ва ихтирооташон дар сатҳи байналмилалӣ низ, мешиносанду эътироф менамоянд”, - гуфт Ҳ. Қурбонзода. 

Зарур шумурда шуд, ки дар шароити имрӯзаи ҷаҳонишавӣ, вусъати рақобатҳои геополитикӣ, авҷи зуҳуроти хатарноки ифротгароиву терроризм ва дигар мушкилоти глобалӣ таҳқиқи ҳамаҷонибаи афкори фалсафию ҳуқуқӣ, иҷтимоиву сиёсӣ ва ахлоқиву маънавӣ талаби замон буда, омӯзиши фарҳанги моддиву ғайримоддии миллат бояд самти афзалиятноки таҳқиқоти илмӣ бошанд. Занону ҷавонон бояд аз ақидаҳои хурофотӣ дур ва донишҳои муосирро ҷиддӣ омӯхта, рӯйдодҳои ҷомеаро аз нуқтаи назари илму мантиқ дуруст таҳлил кунанд ва дар зиндагӣ роҳи ростро интихоб намоянд.

Ҳамчунин, зикр шуд, ки соли гузашта аз 77 нафар ғолиби Озмуни ҷумҳуриявии “Фурӯғи субҳи доноӣ китоб аст” 47 нафар ва аз 79 ғолиби Озмуни “Тоҷикистон - Ватани азизи ман” 18 нафарашон бонувон мебошанд, ки аз фаъол гардидани занон дарак медиҳад. 

“Нақши занон дар ташаккули таҳсилот ва рушди илм дар мақомоти корҳои дохилии Тоҷикистон”, “Механизмҳои дастгирии фаъолияти соҳибкорӣ – омили муҳими рушди иқтисоди миллӣ”, “20 – солаи рушди илмҳои техникӣ ва мақоми бонувон дар он” аз ҷумлаи мавзуъҳое буданд, ки дар ҳамоиш баррасӣ шуданд.  Зимнан, Рӯзи байналмилалии занон ва духтарон дар илм бо қарори Созмони Милали Муттаҳид ҳамасола 11 - уми феврал дар сартосари ҷаҳон таҷлил мегардад. Кумитаи кор бо занон ва оила соли нуҳум аст, ки дар доираи ин ҷашн Ҳамоиши ҷумҳуриявии «Саҳми занон дар рушди илм» - ро ба хотири ҷалби бештари занону бонувон ба пажӯҳиши илмӣ, муаррифии фаъолияти илмии занону бонувони кишвар доир менамояд.

 

Фарзона ФАЙЗАЛӢ, “Ҷумҳурият”