Бо ташаббуси Мақомоти иҷроияи ҳокимияти давлатии ноҳияи Бобоҷон Ғафурови Ҷумҳурии Тоҷикистон ва ноҳияи Лайлаки Ҷумҳурии Қирғизистон дар хати ҳаммарзи ду кишвар мулоқоти дӯстонаи фаъолон ва нафарони рӯзгордидаи ҳар ду ҷониб - Ҷамоати деҳоти Хистеварзи ноҳияи Бобоҷон Ғафуров ва Ҷамоати деҳоти Арқаи  ноҳияи  Лайлак баргузор шуд, ки бешубҳа, шуълаи умедест ҷиҳати эҳёи дӯстиву рафоқат, додугирифти ҳамсоягӣ ва рафтуомад миёни ду халқи аз қадим дӯсту ҳамсоя баъди низоъҳои сарҳадӣ. 

Сари як дастархони муштарак, ки ҳар ду ҷониб оростанд, пирони рӯзгордидаи тоҷику қирғиз оид ба барқарорсозии рафтуомади ҳамдигар, ҳамсоягиву ҳамкорӣ сухан гуфтаву ба ҳарфи ҳамдигар бо таваҷҷуҳ гӯш карданд. Таъкид шуд, ки дӯстии ин ду халқ аз давраҳои қадим маншаъ гирифта, садсолаҳо таҳким ёфтаву аз имтиҳонҳои сангини таърихӣ гузаштааст ва ҳеҷ як низои сарҳадӣ ва баъзе нофаҳмиҳо набояд ба таърихи ғании садсолаҳо бархӯрдори ду миллат хати батлон кашад.    

Намояндагони ҳар ду ҷониб ба таъкид изҳор доштанд, ки гурӯҳи кории ду ҷониб фаъолияташонро бо самар идома диҳанду ба бозкушоии марз ба ҳар ду тараф мусоидат кунанд.

Раиси ноҳияи Бобоҷон Ғафуров Зафарбек Давлатзода ва раиси ноҳияи Лайлак Алмазбек Раҳмонқулов назди ҳозирин сухан гуфта, баргузории чунин мулоқотро аз беҳтарин дипломатияи халқӣ унвон карда, идомабахшии онро фоли нек дар муносибатҳои дӯстонаю бародаронаи ду халқи ҳамсоя арзёбӣ доштанд.

 

Ҷовиди АШТӢ, “Ҷумҳурият”