РБК. Чин ҳеҷ гоҳ ҷорӣ намудани таҳримотро ҳалли муассири буҳронҳо намеҳисобад ва дар шароити феълӣ бо маҳдудиятҳо алайҳи Россия бар ҳамин назар аст, - изҳор дошт котиби Вазорати корҳои хориҷии Чин Хуа Чунйин.

Дипломат, ҳамчунин, таъкид кард, ки таҳримоти ғайриқонунии  якҷониба барои иқтисод ва бахши молиявии кишварҳое, ки нисбати  онҳо маҳдудият ҷорӣ мешавад, мушкилоти ҷиддие ба бор меоранд, вале  онҳо набояд ба ҳуқуқ ва манфиатҳои қонунии дигар кишварҳо зарар расонанд. Аз ин рӯ, Чин ҳамеша мухолифи ҳар гуна таҳримҳои якҷонибаи ғайриқонунист.

 

 

 

Омодагии Беларус барои қабули паноҳандагон аз Донбасс

Лента.ру. Алексей Бегун, роҳбари раёсати шаҳрвандӣ ва муҳоҷирати Вазорати корҳои дохилии кишвар, гуфт, ки Беларус омода аст,  паноҳандагон аз Донбассро қабул намояд ва ба онҳо шаҳрвандӣ диҳад.

- Мо то ҳол маҷрои муҳоҷиронро эҳсос накардаем. Алҳол ба кишвари мо касе наомадааст. Аммо ман фикр мекунам, ки тариқи Россия одамон  мегузаранд ва мо ба қабули онҳо омодаем, - гуфт ӯ. 

Бегун ёдовар шуд, ки аз соли 2014 ба ин сӯ аз минтақаи  даргириҳо дар шарқи Украина ба Беларус наздики 170 ҳазор шаҳрванд омадааст. Як қисмаш барои зиндагӣ дар кишвар монд ва қисми дигар онро тарк кард.

 

 

 

Путин ва Эрдоган табодули назар карданд

Мир24. Президенти Россия Владимир Путин бо Президенти Туркия Реҷеб Тайип Эрдоган дар робита бо барасмият шинохтани Ҷумҳурии Мардумии Донетск  ва Ҷумҳурии Мардумии Луганск  тавассути Россия табодули назар карданд.

Президенти Россия зарурати объек-тивии тасмими гирифташуда дар шароити  ҳамлаи  ҳукуматдорони Украина дар Донбасс ва сарпечӣ аз иҷрои тавофуқоти Минскро таъкид кардааст.

Роҳбарон, ҳамчунин, ба масъалаи кафолатҳои ҳуқуқии дарозмуддати амнияти Россия дахл карданд. Путин аз посухи ИМА ва НАТО, ки як кӯшиши нодида гирифтани нигарониҳо ва дархостҳои қонунии Россия буд, изҳори ноумедӣ кард.

 

 

 

 

СММ Россия ва Украинаро ба муколама даъват намуд

АИР «Новости». Розмари ДиКарло, муовини Дабири кулли Созмони ҷаҳонӣ оид ба масъалаҳои сиёсӣ, гуфт, ки СММ Россия ва Украинаро ба муколама ва дипломатия  барои ҳалли буҳрони кунунӣ даъват менамояд.

«Президенти Украина Владимир Зеленский шоми имрӯз ба идомаи дипломатия даъват кард. Президенти Россия Владимир Путин низ дар бораи омодагии доимии худ барои ширкат дар  гуфтушунид сухан гуфт. Мо ин гуна талошҳоро ташвиқ мекунем», - гуфт ДиКарло дар ҷаласаи изтирории Шурои амнияти СММ, ки бо ташаббуси Украина баргузор шуд.

 

 

 

 

Володин ба Куба  пешниҳод кард, ки ба унвони нозир дар кори АП СААД ширкат варзад

ТАСС. Куба метавонад дар кори Ассамблеяи порлумонии Созмони  Аҳдномаи амнияти дастаҷамъӣ (АП СААД)  дар шакли нозир ё шарик ширкат кунад. 

Бо чунин пешниҳод рӯзи чаҳоршанбе зимни мулоқот бо раиси Маҷлиси миллии қудрати мардумии  Куба Эстебан Ласо Эрнандес, раиси Думаи давлатӣ Вячеслав Володин муроҷиат кард. 

Сиёсатмадор хотиррасон кард, ки ҳоло тарафи Куба ҳамчун меҳмон дар ассамблея ширкат меварзад. «Мо аз дидани сафири Куба дар Россия, ки пайваста дар Ассамблеяи порлумонӣ ширкат мекунад, шодем», - афзуд ӯ.