Бо ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон солҳои 2019-2021 - Солҳои рушди деҳот, сайёҳӣ ва ҳунарҳои мардумӣ эълон гардида буданд. Инак, аз эълони ин иқдом се сол сипарӣ шуд ва фурсат расидааст, ки аз натиҷаҳои тадбироти рӯикоромада дар ин солҳои таърихӣ хулосагирӣ намоем. 

Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров Солҳои рушди деҳот, сайёҳӣ ва ҳунарҳои мардумиро иқдоми саривақтӣ шумурда, баҳри дар амал татбиқ намудани ин ҳадафи бузурги миллӣ тадбирҳои зарур андешид. Яке аз нахустин тадбир дар ин ҷода таъсиси кафедраи умумидонишгоҳии фарҳангшиносӣ ва табдили факултаи геоэкология ба факултаи геоэкология ва туризм мебошад, ки дар тайёр кардани мутахассисони касбии соҳоти мазкур нақши муҳим доранд.   

Дар ин замина, ихтисосҳои географияи сайёҳӣ ва менеҷменти саёҳат, санъати тасвирӣ ва нақшакашӣ, ҳунарҳои халқии бадеӣ, ҳайкалтарошӣ, таъриху фарҳангшиносӣ, таъриху бостоншиносӣ, забонҳои муосири хориҷӣ, таъминоти забонии робитаҳои байнифарҳангӣ (арабӣ-фаронсавӣ), таъминоти забонии робитаҳои байнифарҳангӣ (форсӣ-фаронсавӣ), санъати мусиқӣ ва таҳсилоти томактабӣ ва ғайра рӯи кор омаданд, ки оянда тахассусмандони онҳо дар рушди сайёҳӣ, ҳунарҳои мардумӣ ва рушди кишвар хидмат хоҳанд кард. 

Дар доираи Солҳои рушди деҳот, сайёҳӣ ва ҳунарҳои мардумӣ дар якчанд факултаҳои Донишгоҳ лаборатория, гербарияву галереяҳо таъсис ва мавриди баҳрабардорӣ қарор гирифтанд. Гербарияи ботаникӣ, галереяи ба номи Монӣ ва чанд лабораторияҳои гуногуни таълимӣ мисоли равшани гуфтаи болоянд. 

Яке аз ташаббусҳои саривақтиву муфид таъсиси шуроҳои дессертатсионӣ дар доираи туризм ва ҳунарҳои мардумӣ маҳсуб мешавад. Шурои санъати тасвирӣ ва нақшакашӣ ва таълими касбӣ аз зумраи онҳост, ки давоми се соли охир ба воситаи ин шуроҳо 6 нафар рисолаи номзадӣ дифоъ кард.  

Баҳри ба ҳам овардани илм ва таҷриба ба ташкили экспедитсияҳои сайёҳӣ эътибори махсус дода шуд. Бо дастгирии раёсати Донишгоҳ чунин экспедитсияҳо тавассути хатсайрҳои Хуҷанд – Шаҳристон – Душанбе – Данғара – Даштиҷум, Хуҷанд – Душанбе – Кӯлоб – Дарвоз – Хоруғ – Мурғоб – Хуҷанд, Хуҷанд – Шаҳристон – Хуҷанд ва ғайра ба роҳ монда шуданд. Ҳамзамон, таҷрибаомӯзии донишҷӯён дар минтақаҳои таърихӣ, фарҳангиву сайёҳии кишвар сурат гирифта, натиҷаҳои хуби илмиву таълимӣ ҳосил гардиданд.  

Дар баробари ин, як зумра маҳфилҳои сатҳи донишгоҳӣ ва факултавӣ таъсис дода, барои донишҷӯён омӯзиши васеи ҳунарҳои мардумӣ ба роҳ монда шуд. Дар ин ҷода нақши парки технологии Донишгоҳ, ки солҳои охир фаъолияташ хеле густариш ёфтааст, калон аст.

Эълони Солҳои рушди деҳот, сайёҳӣ ва ҳунарҳои мардумӣ, пеш аз ҳама, ба таъмини зиндагии шоистаи мардум ва муаррифии шоистаи Тоҷикистон ба ҷаҳониён нигаронда шудааст. Давоми се соли татбиқ дар ин ҷода дастовардҳои намоён ба вуҷуд омаданд. Аммо, барои муваффақ шудан ба ҳадафи асосӣ кӯшишу талош, тадбиру чораҳои беш аз пешу рӯзмарраро тақозо мекунад. Бо дарки ин маънӣ раёсати Донишгоҳи давлатии Хуҷанд ба номи академик Бобоҷон Ғафуров дар оянда низ, рушди соҳоти мазкурро ба яке аз самтҳои афзалиятноки фаъолияти хеш табдил дода, пайваста иқдом меварзад. 

 

Ҷамшед ҶӮРАЗОДА,

доктори илмҳои таърих, профессор