Тоҷикистон ҳамчун ҷомеаи демократӣ, ҳуқуқбунёд ва дунявӣ маҳз ба шарофати ҳамовозию дастгирии фаъолонаи бонувони кишвар мавқеи устувору пойдори худро пайдо кард. Президенти Ҷумҳурии Тоҷикистон муҳтарам Эмомалӣ Раҳмон дар яке аз вохӯриҳои худ бо занони фаъолу эҷодкори мамлакат чунин иброз доштанд: «Давлате, ки нисбат ба модар - сарчашмаи ҳаёт ва бақои насли инсонӣ, бепарво бошад, ояндаи худро аз даст медиҳад».  Вобаста ба ин, Ҳукумати Ҷумҳурии Тоҷикистон дар доираи сиёсати иҷтимоии худ бо мақсади ҳалли бисёр масъалаҳои марбут ба ҳаёти занон як қатор барномаҳои муҳими давлатиро амалӣ намуд, ки барои баланд бардоштани мақоми зан дар ҷомеа нақши босазо доранд. 

Бонувони кишварамон дар баробари мардон номуси ватандориро бар дӯши худ гирифта, дар соҳаҳои гуногуни ҳаёти ҷомеа ва давлат фаъолият доранд ва бо ташаббусҳои созандаи худ Тоҷикистони маҳбубамонро боз ҳам ободу зебо мегардонанд. Беҳуда шоир нафармудааст:

Зан набошад, зебу зинат нест дар маъвои мо,

Ҳуш дар сар, равшанӣ дар дидаи бинои мо.

Зан набошад, нест дар рӯи Замин нақши ҳаёт,

Дон, ки бе зан то абад дар гил бимонад пои мо!

 

Вожаи “Модар” дар тамоми забонҳои ҷаҳон оҳанги навозишкорона дорад ва ҳар қадаре, ки муҳаббати инсоният ба модар зиёд бошад, ҳаёт ҳамон қадар фараҳбахшу дурахшон мегардад. Ҳусни ҳаёту файзи зиндагонии мо аз файзи Зан – Модар аст ва ӯ ситораи дурахшонест, ки бо нерумандии атокардаи Худои мутаол роҳи фарзандро дар тули зиндагӣ равшан месозад. 

Дар осори бузургони ҷаҳон низ нақши зан – модари диловару қаҳрамон, ватандӯсту озодихоҳ, соҳибиродаву рисолатшинос ҷойгоҳи арзанда ва хосса дорад. Модар на танҳо ба фарзанди худ ҳаёт мебахшад, балки дар сиришти ӯ хислатҳои накутарини инсониро бо шири поки худ ҷой медиҳад. Бешубҳа, такя дар паҳлуи модар, хоб дар рӯйи зонуи модар шоҳбайти китоби хотираҳои зиндагист. 

Нақши Зан – Модар, махсусан дар тарбия, омӯхтани забон, таъриху фарҳанг, донишҳои муосир ва, умуман, камолоти маънавию ахлоқии фарзанд, барҷаста ва ҳатто муайянкунанда мебошад. 

Дили модар чу дарёи равон аст,

Ҷаҳони меҳри модар бекарон аст.

 

С. ТАИБОВ, 

сардори шуъбаи иттилоот ва 

робита бо ҷомеаи ДДТТ