Боиси ифтихору сарфарозии  саноатчиён аст, ки Паёми имсолаи Сарвари давлат бештар доир ба  рушди саноати кишвар  ироа гардид.

Хусусан, бо мақсади амалисозии ҳадафи чоруми миллӣ – саноатикунонии босуръати кишвар эълон гардидани  Солҳои рушди саноат (2022 – 2026) дар ривоҷу равнақи минбаъдаи мамлакат, ҳалли масъалаҳои иҷтимоиву иқтисодӣ ва иҷрои ҳадафҳои стратегии миллӣ заминаи мустаҳкам хоҳад шуд. 

Саноати сабук яке аз соҳаҳои афзалиятнок ба шумор рафта, дар пешрафти иқтисодиёти мамлакат саҳми назаррас дорад. Мавриди зикр аст, ки сол ба сол содироти маҳсулоти саноати сабук ба хориҷи кишвар зиёд  гардида истодааст. Аз ҷумла, соли 2020 аз ҷониби корхонаҳои соҳа ба маблағи 199,1 миллион доллари ИМА ва дар ёздаҳ моҳи соли равон  247,2 миллион  доллари ИМА маҳсулот содирот шудааст.  

Бо дастгирии роҳбарияти олии кишвар ва Ҳукумати Ҷумҳурии Тоҷикистон  ҷиҳати рушди соҳаи саноати сабук якчанд имтиёзҳои андозии гумрукӣ пешниҳод  гардид, ки корхонаҳои соҳа метавонанд аз онҳо  самаранок истифода  намоянд. Як нуктаи муҳими Паёми Пешвои миллат рушди соҳаи кирмакпарварӣ ва дар ин асос коркарди бештари пиллаи ҷамъоваришаванда ҷиҳати рушд додани соҳаи  шоҳибофӣ ва атласу адрасбофӣ мебошад. ки барои таъсиси  ҳазорҳо ҷойи нави кор барои занону бонувон мусоидат менамояд. Илова бар ин, ба муддати даҳ сол аз пардохти андози ягонаи замин озод намудани тутзор, инчунин аз пардохти андозҳо пурра озод намудани шахсони ҳуқуқие, ки ба коркарди пилла ва истеҳсоли матоъҳои шоҳӣ, атласу адрас ва дигар маснуоти бофандагии дастӣ дар ҷумҳурӣ  машғуланд, иқдоми муҳиму саривақтӣ мебошад. Бешубҳа, чунин тадбир ба рушди саноати кишвар таккони ҷиддӣ хоҳад бахшид.   

Пешвои миллат дар Паёми навбатӣ ба вазорату идораҳои дахлдор  супориш доданд, ки дар панҷ соли минбаъда барои таъмини рушди саноати сабук доир ба таъсиси панҷ маҷмааи коркарди ниҳоии нахи пахта (кластерҳо) бо ҷалби беш аз 11 миллиард сомонӣ чораҳои зарурӣ андешанд. Ҳамзамон, дастур дода шуд, ки бо назардошти фароҳамсозии омилҳои ҳавасмандгардонӣ дар корхонаҳои саноатии аз фаъолият бозмонда, аз ҷумла корхонаҳои нассоҷии дар ихтиёри давлат қарордошта,  низоми идоракунии корпоративӣ роҳандозӣ ва бо ҷалби бахши хусусӣ фаъолияти самараноки онҳо ҳарчи зудтар таъмин гардад. 

Суханони роҳнамо ва нуктаҳои фарогир дар сиёсати дохилию  хориҷии кишвар дар ҳар сатри Паём дида мешуд. Мо, саноатчиён ва дар умум, мардуми сарбаланди кишвари азиз - Тоҷикистон бояд суханони хеле бамавриди Пешвои миллат: “Мо бояд ташаббускору ташкилотчӣ бошем ва саҳми бевоситаи худро дар ободии мулки аҷдодӣ гузорем”-ро сармашқи кори худ намоем.

 

Малика ЯРБАБАЕВА, 

сардори Раёсати саноати сабук ва пиллаи 

Вазорати саноат ва технологияҳои нав