Бо иқдоми Ҳукумати Ҷумҳурии Тоҷикистон то 11 март 303 шаҳрванди Тоҷикистон бо шумули занону пиронсолон ва ноболиғон, ки аз ҳудуди Украина ба Лаҳистон ворид гардида буданд, ба Ватан баргардонда шуданд.

Ба иттилои Вазорати корҳои хориҷӣ, шаҳрвандон тавассути ширкати лаҳистонии «Enter Air» аз Варшава ба Душанбе оварда шуданд.

 

 

Рамазон Раҳимзода бо роҳбарони чанд шаҳри Эрон мулоқот кард 

Вазири корҳои дохилӣ Рамазон Раҳимзода бо роҳбарони шаҳрҳои Теҳрон, Машҳад, Кирмон, Қазвин, Буҷнурд, Арок ва Кирмоншоҳи Ҷумҳурии Исломии Эрон, ки дар шаҳри Душанбе буданд, мулоқот кард. 

Дар вохӯриҳо сафири фавқулода ва мухтори Ҷумҳурии Исломии Эрон дар Тоҷикистон Муҳаммадтақӣ Собирӣ ҳузур дошт.

Маркази матбуоти Вазорат хабар медиҳад, ки ҷонибҳо масъалаҳои рушди робитаҳо, тақвият бахшидани муносибатҳои дӯстона ва масъалаҳои дигари мавриди таваҷҷуҳи тарафайнро мавриди баррасӣ қарор доданд.

 

 

Имзои созишномаҳои муҳим 

Дар Вазорати молия Созишномаи грантӣ байни Ҷумҳурии Тоҷикистон, Бонки аврупоии таҷдид ва рушд ва КВД «Хоҷагии манзилию коммуналӣ»-и ноҳияи Файзобод, Созишномаи қарзӣ байни Ҷумҳурии Тоҷикистон ва Бонки аврупоии таҷдид ва рушд, Созишномаи дастгирӣ байни Мақомоти иҷроияи маҳаллии ҳокимияти давлатии ноҳияи Файзобод ва Бонки аврупоии таҷдид ва рушд ва Созишномаи лоиҳавӣ байни КВД «Хоҷагии манзилию коммуналӣ» -и ноҳияи Файзобод ва Бонки аврупоии таҷдид ва рушд оид ба лоиҳаи “Барқарорсозии шабакаи обтаъминкунӣ ва обпарто дар ноҳияи Файзобод”-ро ба имзо расонданд.

Арзиши умумии лоиҳа 4,4 миллион евроро ташкил медиҳад, ки аз он 1,8 миллион евро қарзи имтиёзноки Бонки аврупоии таҷдид ва рушд ва 2,6 миллион евро гранти Ҳукумати Конфедератсияи Швейтсария мебошад. 0,8 миллион евро ҳамчун кумаки техникӣ пешниҳод шудааст.

 

 

Беш аз 24 миллион доллар барои муқовимат ба COVID-19

Дар Вазорати молия маросими баимзорасонии Созишнома оид ба маблағгузорӣ (маблағгузории сеюми иловагӣ барои лоиҳаи фавқулодаи муқовимат ба вируси COVID-19 дар Тоҷикистон) байни Ҷумҳурии Тоҷикистон ва Ассотсиатсияи байналмилалии рушд баргузор гашт. 

Созишномаро вазири молия Файзиддин Қаҳҳорзода ва намояндаи доимии Бонки ҷаҳонӣ дар Тоҷикистон Озан Севимлӣ имзо карданд.

Арзиши умумии лоиҳа дар доираи Созишномаи маблағгузории сеюми иловагӣ ба 25 миллион доллар баробар аст.

Аз он 24, 26 миллион доллар барои харид ва таҳвили ваксинаҳои зидди бемории COVID-19, тестҳои ташхисӣ, доруворӣ, маводи масрафшаванда ва рушди инфрасохтори хизматрасонии соҳаи тандурустӣ масраф мешавад.

 

 

Ду ширкати нав вориди бозори сайёҳӣ гардид

Ду ширкати нави сайёҳӣ – «Мунзал» ва «Навранга» вориди бозори сайёҳии  Тоҷикистон гардид, ҳамзамон, муҳлати амали иҷозатномаи фаъолияти сайёҳии  ширкати сайёҳии «Вип тревел энд тур» тамдид ва ба ширкатҳои сайёҳии «Зерафшан маҷестик трэвел», «Тансавиа Экспресс», «Чилмеҳроб», «Роҳат Тур», «Сафеддара» ва ба «Асcотсиатсияи тараққиёти сайёҳии  Зарафшон» аз нав иҷозатномаи фаъолият дода шуд, - иттилоъ дод Кумитаи рушди сайёҳӣ.

Зимни тақдими иҷозатномаҳои фаъолияти сайёҳӣ ба ширкатҳои навтаъсис раиси кумита Тоҷиддин Ҷӯразода таваҷҷуҳи роҳбарони ширкатҳоро ба масъалаҳои татбиқи босамари  имтиёзҳо дар соҳаи сайёҳӣ, ки бо ташаббуси Пешвои миллат роҳандозӣ гардиданд, ҷалб намуд.

 

 

Фестивали филмҳои ИМА ва Тоҷикистон

Аз 13 то 18 марти соли 2022 Сафорати ИМА дар Душанбе нахустин фестивали филмҳои ИМА ва Тоҷикистонро дар ҳамкорӣ бо Муассисаи давлатии «Тоҷикфилм», бахшида ба 30-юмин солгарди барқарор намудани равобити дипломатии Амрико ва Тоҷикистон баргузор мекунад. Филмҳое, ки барои фестивал интихоб шудаанд, анъанаҳои синамои ҳар ду кишварро васф менамоянд.

Ба иттилои Сафорат, дар фестивал як силсила филмҳое намоиш дода мешаванд, ки дастовардҳои беҳтарини фарҳанги ИМА ва Тоҷикистонро муаррифӣ мекунанд. Намоиши филмҳо дар кинотеатри «Тоҷикфилм» ва дар Маркази амрикоии шаҳри Душанбе баргузор мешаванд. Тамоми намоишҳо аз ҷониби Сафорати ИМА сарпарастӣ шуда, даромад ройгон аст.