БЕ МЕССИ ВА РОНАЛДУ ИДОМА МЕЁБАД 

 

Дар бозии ҷавобии даври 1/8-ниҳоии Лигаи қаҳрамонҳо «Бавария» дар майдонаш дастаи РБ “Залтсбург”-ро бо ҳисоби калони 7:1 (қувваозмоии аввал 1:1) торумор кард ва аз рӯйи натиҷаи ду бозӣ ба даври дигар роҳ ёфт. Ҳамлагари мюнхениҳо Роберт Левандовский то дақиқаи 23-юми рақобат се гол зад, ки дар таърихи мусобиқот барвақттарин хет-трик дар даври плей-офф сабт шуд. Ӯ аз ҳамлагари «Милан» Марко Симоне, ки дар 24 дақиқаи аввали бозӣ соли 1996 ба дарвозаи “Русенборг” се гол зада буд, пеш гузашт.

Тими «Реал» (Мадрид), ки дар бозии аввали даври 1/8 финал аз «ПСЖ» бо ҳисоби 1:0 шикаст хӯрда буд, дар рақобати ҷавобӣ ба таври ҳангомавӣ пирӯз омад. Зӯрозмоӣ, ки дар майдони «Реал» сурат гирифт, якум меҳмонон бо голи задаи Килиан Мбаппе (дақ.39) ба пеш баромаданд. Ва бо ҳамин ҳисоб нимаи аввал ба анҷом расид. Дар қисми дуюм Карим Бензема се тӯбро (дақ. 61, 76, 78) вориди дарвозаи «ПСЖ» намуда, роҳи тимашро ба даври 1/4 финал ҳамвор кард.   

Дар қувваозмоии миёни тимҳои «Манчестер Юнайтед» ва «Атлетико» (1:1) бозигарони шаҳри Мадрид дар меҳмонӣ бо голи задаи Ренан Лоди (дақ. 41) ғолиб омада, роҳашонро ба даври дигар ҳамвор намуданд.   

Се бозии дигар аз рӯи ҳисоби умумӣ бо чунин натиҷа хотима ёфт: «Ливерпул» – «Интер» – 2:1, «Манчестер Сити» – «Спортинг» – 5:0, «Аякс» – «Бенфика» – 2:3.

Зӯрозмоиҳои ҷавобии боқимонда миёни тимҳои «Ювентус» – «Вилярреал» (1:1) ва «Челси» – «Лилл» (2:0) 17 март баргузор мегарданд. 

 

 

 

ЧЕМПИОНАТИ CAFA – 2022

Бонувони эронӣ ғолиби мусобиқа  

Мунтахаби Эрон ғолиби Чемпионати Ассотсиатсияи футболи Осиёи Марказӣ (CAFA) миёни мунтахабҳои бонувони то 18-сола (11 – 15 март, Душанбе, Тоҷикистон) гардид.

Ҳамин тавр, зинаи дуюму сеюмро мутаносибан тимҳои Ӯзбекистон ва Қирғизистон гирифтанд. 

Футболбозбонувони тоҷик бошанд, мақоми охирро ба даст оварданд.

Ёдовар мешавем, ки чемпионат миёни тимҳои Тоҷикистон, Ӯзбекистон, Эрон ва Қирғизистон тибқи системаи даврӣ дар як давр доир гашт. 

 

Маҳмуд БАҲРОМ,  шореҳи варзиш