Бо иштироки раиси шаҳри Душанбе Рустами Эмомалӣ дар кӯчаи Миралӣ Маҳмадалии ноҳияи Фирдавсӣ корхонаи истеҳсоли уребчаҳо мавриди баҳрабардорӣ қарор гирифт. Дар ин бора шуъбаи иттилоотии дастгоҳи раиси шаҳр хабар дод.

 

Раиси шаҳр нахуст бо шароити фароҳамовардаи кор дар корхонаи мазкур ошно гардиданд. Иттилоъ дода шуд, ки коргоҳи мазкур аз ду қисм - коргоҳи истеҳсолию анборхона ва қисми маъмурӣ иборат буда, дар он 150 нафар ба кори доимӣ фаро гирифта шудааст. Корхона имкон дорад, ки дар се баст фаъолият намуда, дар як дақиқа то 600 адад  ва дар як шабонарӯз зиёда аз 800 ҳазор уребча истеҳсол намояд.

Сохтмони корхона дар асоси дастуру ҳидоятҳои Сарвари давлат муҳтарам Эмомалӣ Раҳмон оид ба эълон гардидани солҳои 2022-2026 – Солҳои рушди саноат ва қарори раиси шаҳр, аз ҷониби ҶДММ «Васли Моғиён» соли 2020 оғоз гардида буд.

Фармоишгари корхонаи истеҳсолӣ роҳбари ҶДММ «Афзалият групп» Абдураҳмон Ғайбуллозода буда, корҳои лоиҳакашӣ аз ҷониби Ҷамъияти саҳомии кушодаи «Селтехпроект» бо риояи стандартҳои ҷаҳонӣ анҷом дода шудааст.

Масоҳати умумии корхона 11845,0 метри мураббаъро ташкил дода, аз ду ошёна иборат мебошад, ки дар он 11 ҳуҷраи корӣ, ошхона барои кормандон ва озмоишгоҳ барои санҷиши маҳсулоти истеҳсолшуда ҷойгир аст.

Корхонаи мазкур бо арзиши понздаҳ миллион сомонӣ бунёд гардида, таҷҳизоти истеҳсолии он аз технологияи итолиявии ширкати «Фамеканика Машинери»-и Ҷумҳурии Италия мебошад.

Дар оянда масъулон нақша доранд, ки бо бештар намудани ҳаҷми истеҳсоли уребчаҳо содиротро ба хориҷи кишвар низ ба роҳ монанд.

Рустами Эмомалӣ масъулонро муваззаф намуд, ки дар самти баланд бардоштани сифати маҳсулоти истеҳсолӣ таваҷҷуҳи бештар зоҳир намоянд.

 

Лашкар ШАРИФЗОДА,

«Ҷумҳурият»