Таҳти раёсати раиси вилояти Хатлон Қурбон Ҳакимзода иҷлосияи даҳуми маҷлиси вакилони халқи вилоят, даъвати шашум баргузор гардид. Дар он рафти иҷрои қарори маҷлиси вакилони халқи вилоят аз 25 декабри соли 2020, №110 «Дар бораи тасдиқ намудани Барномаи рушди иҷтимоию иқтисодии вилоят барои солҳои 2021 - 2025» дар шаҳру ноҳияҳо мавриди баррасӣ қарор гирифт.

Муовини раиси вилоят Сулаймонзода Акрам иттилоъ дод, ки дар вилоят 368 лоиҳа ба маблағи зиёда аз 8 миллиард сомонӣ марҳила ба марҳила бояд амалӣ гардад. Айни замон 62 лоиҳа бо азхудкунии 15,6 фоизи маблағҳо сурат гирифта, корҳо дар ин самт идома доранд.

Ҳамзамон, Маҷиди Муҳтадӣ, раиси ноҳияи Ховалинг, Садриддинзода Баҳриддин,  раиси ноҳияи Қубодиён ва дигарон вобаста ба корҳои анҷомёфта дар самти ободонӣ ва бунёди корхонаҳои хурди истеҳсолӣ, таъмири роҳҳои маҳаллӣ, боз ҳам беҳтар кардани ҳолати мелиоративии заминҳо, ба гардиши кишоварзӣ дохил кардани заминҳои бекорхобида, таъмини амнияти озуқаворӣ, таъсиси корхонаву сехҳои истеҳсолӣ ва бо ҷойи кор таъмини ҳарчи бештари бекорон  ибрози ақида карданд.

Ҳисоботи директорони генералии Ҷамъияти саҳомии кушодаи «Фурудгоҳҳои байналмилалии Бохтару Кӯлоб» оид ба рушди соҳаи авиатсияи гражданӣ дар вилоят шунида шуд. Фаъолияти фурудгоҳҳои Бохтар ва Кӯлоб хуб буда, таъмиру азнавсозии ҷойи пазироӣ, таъсиси гӯшаҳои таблиғотӣ бо се забон: тоҷикӣ, русӣ ва англисӣ, хариди техникаҳои барои фурудгоҳ пешбинишуда аз фаъолияти назарраси онҳо бозгӯӣ мекунад.

Вакил Абдуалим Исмоилзода, раиси комиссияи доимии маҷлиси вакилони халқи вилоят оид ба қонуният, тартиботи ҳуқуқӣ, мудофиа ва амният, бобати корҳои иҷрошуда дар якчанд ноҳияҳо ҳисобот дод. Ба андешаи ӯ, дар фаъолияти мақомоти иҷроияи ҳокимияти давлатии шаҳру ноҳияҳо камбудиҳои ҳалталаб ҷой доранд ва  зарур аст, ки барои ислоҳи онҳо чораандешӣ шавад. Аз ҷумла, дар самти ҳуҷҷатгузорӣ, бақайдгирии дафну азодорӣ, муқовимат бо терроризму ифротгароӣ, бурдани корҳои таблиғотию ташвиқотӣ ва риояи тарзи дурусти ҳаёти солим.

Дар охир Қурбон Ҳакимзода аз масъулон даъват ба амал овард, ки дар иҷрои масъулияти базиммадошта фориғболӣ накарда, сидқан дар пайи беҳбудии рӯзгори сокинони вилоят бошанд.

 

Нигина РАҲМОН, «Ҷумҳурият»