Известия. Дар Чин, сеюмин нишасти вазирони корҳои хориҷӣ дар формати кишварҳои ҳамсояи Афғонистон оғоз шуд. Дар ин бора   намояндаи расмии Вазорати корҳои хориҷии Россия Мария Захарова   хабар дод. Вай ёдовар шуд, ки Россияро дар ин нишаст вазири корҳои хориҷии Россия Сергей Лавров намояндагӣ мекунад.

 

 

Дар ин нишаст, ки таҳти раёсати Ван И, вазири корҳои хориҷии Чин, баргузор мешавад, вазирони корҳои хориҷӣ ё намояндагони Покистон, Эрон, Тоҷикистон, Туркманистон ва Ӯзбекистон ширкат доранд.

Дар ҷараёни конфронс ширкаткунандагон аз рӯйи чунин масъалаҳо, аз қабили мусоидат ҷиҳати ба эътидол овардани вазъ дар Афғонистон, кумаку дастгирӣ ба мардуми афғон мубодилаи афкор ва мавқеъро мувофиқа хоҳанд кард.

 

 

Мулоқоти президентҳои Туркия ва Ӯзбекистон

CentralAsia (UZ). Бо даъвати Президенти Ӯзбекистон Шавкат Мирзиёев Президенти Туркия Реҷеп Тайип Эрдоган бо сафари расмӣ вориди Тошканд шуд.

Сарварони давлатҳо доир ба рушди минбаъдаи ҳамкориҳои бисёрҷанбаи Ӯзбекистону Туркия бар пояи эҳтиром, дӯстӣ ва боварӣ мубодилаи афкор намуданд. Таваҷҷуҳи асосӣ ба масъалаҳои баланд бардоштани сатҳи муносибатҳои шарикии стратегӣ, амиқсозии робитаҳои сиёсӣ, байнипарлумонӣ, тиҷоратӣ-иқтисодӣ ва фарҳангию гуманитарӣ зоҳир гардид.

Сипас, ҷаласаи дуюми Шурои ҳамкориҳои стратегии сатҳи олии Ӯзбекистону Туркия баргузор шуд. Президентҳо батафсил самтҳои авлавиятнокро барои тавсеаи ҳамкориҳои минбаъда дар назар гирифтанд. Бо назардошти миқёси ҳамкориҳои бадастомада ҷонибҳо тасмим гирифтанд, ки муносибатҳои дуҷонибаро ба сатҳи нав – шарикии ҳамаҷонибаи стратегӣ расонанд. Дар анҷоми музокирот маросими баимзорасонӣ ва табодули санадҳо сурат гирифт.  

 

 

Чин дар тиҷорати сӯзишворӣ бо Россия гузаштан ба рубл ё юанро истисно накард

ТАСС.  Вазорати корҳои хориҷии Чин иттилоъ дод, ки ҳукуматдорони Чин имкони гузаштан ба рубл ё юанро дар ҷараёни тиҷорати сӯзишворӣ бо Федератсияи Россия рад намекунанд. 

«Истифодаи воҳидҳои пулии миллии худ дар раванди ҳамкории муназзами тиҷоратӣ ва иқтисодӣ метавонад барои пешгирӣ аз хатарҳои асъорӣ ва коҳиши хароҷоти марбут ба мубодилаи асъор кумак кунад», - гуфтааст ВКХ-и Чин.

Вазорати корҳои хориҷии Чин таъкид кард, ки ширкатҳои чинӣ ният доранд,  «бо назардошти тағйирот дар вазъи бозор» дар тиҷорат бо Федератсияи Россия аз рубл ё юан фаъолонатар истифода баранд. «Албатта, бо сабабҳои гуногун мо ҳисоббаробаркуниро бо асъори дигар кишварҳо анҷом медиҳем», - шарҳ доданд дар Вазорат.

 

 

 

Вазири корҳои хориҷии Фаронса муколамаи Макрон ва Путинро зарур мешуморад

ТАСС. Жан-Ив Ле Дриан, вазири корҳои хориҷии Фаронса, изҳори итминон кард, ки музокироти президентҳои Фаронса ва Россия Эммануэл Макрон ва Владимир Путин зарур аст.

Ле Дриан: "Муколамаро бо Президент Путин нигоҳ доштан лозим аст. Аз ин рӯ, Президент Макрон суҳбатҳои телефониро идома медиҳад, то имкони муколамаро нигоҳ дорад", - гуфт ӯ дар мусоҳиба бо шабакаи телевизионии France 24. 

Ба гуфтаи вазир, ҳангоми музокирот ҳар як ҳамсуҳбат мавқеи худро равшан баён мекунад. «Возеҳият дар муколамаи ҳар ду тараф мавҷуд аст. Чунин муколамаро нигоҳ доштан муҳим мебошад, то дар вақти муносиб гуфтушунидҳои  асоситар  ба амал оянд. Умедворам, ин лаҳза ба зудӣ фаро мерасад», - таъкид кард ӯ.